google-site-verification: google21d08411ff346180.html Молитва преподобным отцам, на Святой горе Афонской просиявшим | Справочно-информационный портал Алчевского благочиния

Молитва преподобным отцам, на Святой горе Афонской просиявшим

Июль 7th 2013 -

Собор всех преподобных и Богоносных отцев, во Святой Горе Афонской просиявших

Тропарь Всех преподобных и богоносных отцев, во Святой Горе Афонской просиявших

Пустыни Афонския отцы,/ Ангелы во плоти,/ исповедники вкупе и преподобнии,/ святители же и мученики в пениих почтим,/ подражающе добродетелем их,/ зовуще согласно и глаголюще:/ слава Прославльшему вы,/ слава Венчавшему вы,/ слава в бедах предстатели нам вы Показавшему.

Кондак Всех преподобных и богоносных отцев, во Святой Горе Афонской просиявших

Онебесившия Гору сию,/ и показавшая в ней житие ангельское,/ и множество монахов собравшия отцы,/ приидите, благохвалим вси, к ним взывающе:/ всякия беды и искушения нас избавите,/ множество преподобных,/ Афонская похвало.

Молитва

О преподобнии и богоноснии отцы наши Афонстии, светила земная пресветлая, от пустынных удолий Святыя Горы Афонския, в Церкви Православней славно просиявшии, и Святую Гору вселения вашего жития добротами онебесившии, всю же вселенную высоких добродетелей светлостьми и чудес Божественных блистании удивившии.

Ныне смертным западом вы плотски на время во гроб зашедше, душами вашими со Христом, Солнцем правды, суще праведницы, просвещаетеся яко солнце во царствии небеснем, идеже молитвенныя ваша, к Богу, Свету истинному, лучи простирающе, не забудите и нас, чад ваших духовных, в нощи страстей и скорбей пребывающих, свыше благодатными призирати осиянии, яко да во свете добродетельнаго жития вашего право ходяще путем заповедей Христовых, сподобимся зрети свет неприступныя славы Божия, хваляще купно с вами в Троице Святей славимаго и покланяемаго Бога, Отца и Сына и Святаго Духа в нескончаемыя веки. Аминь.

Акафист преподобным отцам, на Святой горе Афонской просиявшим

Комментарии закрыты.