google-site-verification: google21d08411ff346180.html Акафист иконе Едина Надеждо отчаянных | Справочно-информационный портал Алчевского благочиния

Акафист иконе Едина Надеждо отчаянных

Март 3rd 2016 -

Кондак 1

Взбранной Воеводе Божией Матери и Небесной нашей покровительнице; вси в борьбе со страстьми, похотьми и соблазанами житейскими изнемогающыя, во уныние и отчаяние пришедшыя и плоды благодати Святаго Духа чрезмерною печалию изсушившия, но внезапно Царицею Небесною укрепленныя, радостно взывают:

Радуйся, Премилосердная Богородице Дево, едина надеждо отчаянных, в борьбе со страстьми изнемогающих.

Икос 1

Ангели удивляются, Богородице Дево, Твоей неутомимой помощи грешним людем, жаждущым спасения, но от борьбы со страстьми, похотьми и соблазнами изнемогающым, с великою любовию ангельским языком славословят Тя, Пренепорочная:

Радуйся, святых ангелов служити грешным людям посылающая;
Pадуйся, Сама многажды чад Твоих немощных укрепляющая.
Радуйся, уныние от печальных сердец отгоняющая;
Радуйся, ленивых и нерадивых подвизатися ради Царствия Небеснаго заставляющая.
Радуйся, закоснелым в лени и в нерадении мучитися совестию допускающая;
Радуйся, во отчаяние пришедших, но Бога не разлюбивших, от окончательной гибели спасающая.
Радуйся, полчища бесовския, на них нападающия, вмиг разгоняющая;
Радуйся, яко Тобою и грешныя людие исправляются.
Радуйся, Премилосердная Богородице Дево, едина надеждо отчаянных, в борьбе со страстьми изнемогающих.

Кондак 2

Видяще Пречистею Деву, таковую велию милость ко грешником проявляющую, и всех любящих Ея, на правом пути спасения укрепляющую, очнемся, братие, от непомерней печали и воззовем к Ней: помози нам, Царице Небесная, примири нас с Сыном Своим, укрепи нашу волю к добродетельной богоугодной жизни, да прогнав от себя лень и нерадение, воззовем к Богу: Аллилуиа.

Икос 2

Тма греховная окружила нас и разум наш омрачается, яко своею лению и нерадением впали мы в забвение и окамененное нечувствие, темже яко рабов своих понуждают ны демони работати греху, понеже волею своею вдалися мы в руце их и сдружилися с обществом сатанинским, но аще и не считаем себя причастными ему, обаче и добрых дел не творим: обеты, данныя Богу, не исполняем, в разслабление греховное впадше, но, надеяся на заступление Твое и на помощь благоутробия Твоего, взываем Ти сице:

Радуйся, всем любящим Триипостасного Бога, скорая попечительнице;
Радуйся, в борьбе со страстьми изнемогающым скорая помощнице.
Радуйся, многоглаголивых и пустословных молчати и Бога боятися научающая;
Радуйся, ленивых и сонливых к бодрствованию воздвизающая.
Радуйся, омраченныя суетою и нерадением чрез печаль сердечную вразумляющая;
Радуйся, не любити мира и вся, яже в мире, наставляющая.
Радуйся, прежде любити ближняго своего научающая;
Радуйся, от любве к ближнему к любве Божией их приводящая.
Радуйся, Премилосердная Богородице Дево, едина надеждо отчаянных, в борьбе со страстьми изнемогающих.

Кондак 3

Грех овладел нами, в броню нечувствия заключил сердца наша: не имамы стыда, ни покаяния, ни слез, ни страха Божия. Помрачилися грехом духовныя очи наша и не вемы, что творим: доброе или злое, утопая в бездне греховней. Но Твоими, Владычице, молитвами возбужденная совесть наша и обличает нас, и научает не имети надежды на своя немощныя силы, но в несумненной надежде на Твое всесильное заступление пред Богом вопияти Ему: Аллилуиа.

Икос 3

Имущи Тебе, Великую Ходатаицу за род христианстий пред возлюбленным Сыном Твоим и Богом нашым, молящую Его да не погубит за грехи наша всех, в плен бесовом впадших, но возвратит жаждущыя спасения к добродетельней жизни, да укрепит их в борьбе со страстьми, похотьми и соблазнами житейскими, и мы грешныя дерзаем вознести глас к Тебе, Неискусомужняя:

Радуйся, Благодатная, день и нощь за ны, грешныя, Сына Своего умоляющая;
Радуйся, яко и нас Ему молитися научающая.
Радуйся, творити волю Божию нам помогающая;
Радуйся, славити Бога нас вразумляющая.
Радуйся, служити ближним, яко чадам Божиим, нам повелевающая;
Радуйся, чрез любовь к ближнему любить Бога нас научающая.
Радуйся, память о ближнем с памятью Божией в нас соединяющая;
Радуйся, усердная хранительнице иноков в борьбе с блудной страстию им помогающая.
Радуйся, Премилосердная Богородице Дево, едина надеждо отчаянных, в борьбе со страстьми изнемогающих.

Кондак 4

Буря суетных помышлений и дел омрачает наш ум, яко не видети нам, ниже чувствовати грехов своих, обвиняем бо ближняго своего в скорбех наших и печалех; обаче имуще надежду на Тя, и мы, побежденныя различными страстьми и похотьми, плененныя бесовскими наваждении и страхованиями, охладевшия к молитве и доброделанию, от всего сердца не престанем просити помощи Твоея, воспевая Богу: Аллилуиа.

Икос 4

Слышавше, яко Сын Твой преклоняется ко всякой мольбе Твоей за ны, грешныя, ихже Ты, Всемилостивая, желаеши спасти, молим Тя: да укрепит Господь и нас по молитве Твоей паки творити волю Божию, а не волю бесовскую, да поможет нам приклонити волю свою искренне работати Триипостасному Богу, да Тебе с любовию зовем:

Радуйся, наша истинная ходатаице и заступнице;
Радуйся, яко Сын Твой Тебя ради нас милует.
Радуйся, яко без Тебе никтоже может спастися;
Радуйся, яко Ты еси единая лествице от земли на небо.
Радуйся, яко Ты еси единая наша верная и надежная путеводительнице в Царство Небесное;
Радуйся, яко чрез Тебе падшия людие возвращаются в рай.
Радуйся, рождшая нам Спасителя душ наших;
Радуйся, укрепляющая нас в напастех от враг видимых и невидимых.
Радуйся, Премилосердная Богородице Дево, едина надеждо отчаянных, в борьбе со страстьми изнемогающих.

Кондак 5

Своим целомудрием и смиренномудрием, Пречистая, превзошедши вся земнородныя, удостоилася еси дати Свою пречистую кровь на соткание плоти Сыну Божию, но аще и почитаема еси ангельскими чинами и сонмом святых Царицею Неба и земли, обаче не оставляеши и нас, грешных, но присно молиши возлюбленнаго Сына Твоего, да причислит ны Своему избранному стаду, и Сама неустанно помогаеши всем право верующим во Христа и поющим Ему: Аллилуиа.

Икос 5

Ведуще велию милость Божию к почитающым Его, даровавшаго нам Тебе, Заступницу рода христианскаго, да ни един истинно верующий во Христа не погибнет, аще прибегнет к Тебе, Божией Матери, за помощию и утешением, со благодарением во умиленном сердце зовем Ти:

Радуйся, единое наше в скорбех утешение;
Радуйся, единое наше тайное вразумление.
Радуйся, ума нашего просвещение;
Радуйся, душ и телес наших исцеление.
Радуйся, наше с Богом примирение;
Радуйся, в Царство Небесное наше возведение.
Радуйся, мудрая украсительнице душ святых;
Радуйся, единая помощнице во благих начинаниях наших.
Радуйся, Премилосердная Богородице Дево, едина надеждо отчаянных, в борьбе со страстьми изнемогающих.

Кондак 6

Проповедницы истиннии явилися святии апостоли, слышавше от Тебе, Богородительнице: «Аз есмь с вами до скончания века!» Не остави и нас, аще и просвещенных учением святых апостолов, обаче по множеству грехов во уныние и отчаяние впадших; помози нам, Владычице, уклонятися от всего злаго и богопротивнаго, яко не имамы сил отстати от своих греховнех привычек, и всем сердцем, и всею волею служити Богу, не можем паки духовныма очима воззрети горе, но пораженныя безволием и унынием молим Тя о помощи, Всепетая, с жалобным стоном взывая к Богу: Аллилуиа.

Икос 6

Показала еси нам свет истинный – Христа Бога нашего, Пренепорочная Богородительнице, яко Ты еси небесныя врата, имиже на землю сниде Сын Божий, да Тобою возведется род христианский в Царствие Небесное. Мы же, надеяся на помощь Твою, молим Тя: не остави нас, волею разслабленных и безпомощных, утративших надежду на спасение; но помози нам и научи, Премилосердная, исправити греховное свое житие, дабы усердно благоугождая Богу, возмогли мы воспевати Тебе сицевая:

Радуйся, Пренепорочная, плотию Спаса и Бога нам рождшая;
Радуйся, Препрославленная, яко Сыном Твоим, Богочеловеком, грехи нам прощаются.
Радуйся, яко Твоим ходатайством людие покаянием на место ангелов падших возводятся;
Радуйся, яко любовию Твоею мы, мертвыя духом, оживотворяемся.
Радуйся, яко Тобою от сна греховнаго просыпаемся;
Радуйся, яко Тобою совесть наша очищается.
Радуйся, яко Тобою бодрость духовная в нас появляется;
Радуйся, яко Тобою ум наш просвещается.
Радуйся, Премилосердная Богородице Дево, едина надеждо отчаянных, в борьбе со страстьми изнемогающих.

Кондак 7

Вемы, яко Ты еси воистинну помощнице всем, усердно борющимся со страстьми, похотьми и соблазнами, в смирении претерпевающим вся скорби житейския: лишения и притеснения от злых людей и бесов. Темже и мы, аще по немощи человечестей и впадаем во грехи, но надеяся на Твое заступление и помощь, Царице Небесная, усердно взываем Богу: Аллилуиа.

Икос 7

Новую показал еси нам милость Свою Творец явлением чудотворныя Твоея иконы, нареченныя «Едина Надеждо отчаянных». Мы же, грехми благодать потерявшыя, темже во уныние и отчаяние пришедшыя, видяще яко с верою приходящыя к ней получают помощь и скорое исцеление, воспеваем Ти сицевая:

Радуйся, благая Целительнице болезней душевных и телесных;
Радуйся, во всех скорбных обстояниих наше истинное увеселение.
Радуйся, яко Тобою ожесточенныя и озлобленныя сердцем смягчаются;
Радуйся, яко Тобою ненавистницы любовию обогощаются.
Радуйся, яко Тобою нетерпеливыя терпети научаются;
Радуйся, яко Тобою завистливыя доброжелательными бывают.
Радуйся, яко Тобою сребролюбцы нестяжательными и щедродательными становятся;
Радуйся, яко тобою пияницы и табакокуры от гнусных страстей избавляются.
Радуйся, Премилосердная Богородице Дево, едина надеждо отчаянных, в борьбе со страстьми изнемогающих.

Метки:

Pages: 1 2

Оставьте комментарий!