google-site-verification: google21d08411ff346180.html Акафист иконе Едина Надеждо отчаянных | Алчевск Православный

Акафист иконе Едина Надеждо отчаянных

Март 3rd 2016 -

Кондак 8

Странное чудо явил еси нам Творец, даровавый Тебе, о Богомати, великую Помощницу всем, потерявшым надежду на исправление греховныя жизни. Мы же, поработившеся злым своим обычаям, не имамы сил преискренне служити Богу и туком божественныя Его сладости духовно насыщатися, темже паче во уныние и отчаяние пришедше, со слезами припадаем к Тебе, Пренепорочная, да умолиши Сына Твоего за ны, вопиющия к Богу: Аллилуиа.

Икос 8

Вси заблуждшия в сей привременней жизни, соблазнами развращеннаго мира сего уловленныя и духовныя своя очи тем помрачившыя, не имущи в сем мори житейстем ни кормчего, ни учителя, не ведают, како устроити житие свое во еже спастися: кое правило исполняти, кое имети поведение, дабы Богу угодити и нечестивыя не раздражати до зела, да не яко дивии вепри нападут на ны и растерзают прежде времени, к Тебе, истинней Путеводительнице, в надежде на помощь прибегают, глаголя:

Радуйся, о быстротечности жизни сей нас помнить научающая;
Радуйся, просящым помощи Твоея, жизненный крест нести помогающая.
Радуйся, тленное богатство презрети вразумляющая;
Радуйся, нетленное сокровище на небеси приобретати повелевающая.
Радуйся, благодать душам нашым возвращающая;
Радуйся, возбудитися от сна нашей совести и помятование сохранити о Боге нам помогающая.
Радуйся, богоугодно молитися нас научающая;
Радуйся, непрестанно за ны молитвы к Богу возносящая.
Радуйся, Премилосердная Богородице Дево, едина надеждо отчаянных, в борьбе со страстьми изнемогающих.

Кондак 9

Всякое естество ангельское удивляется Твоему милосердию ко грешнему роду человеческому, погибающему в тине страстей, похотей и соблазнов, яко Ты, болезнуя о нас, не на небесех пребываеши в наслаждении духовных благ, но неустанно на земли труждаешися, спасая душы наша, аще искаженныя грехом, но в надежде на милосердие Божие вопиющия Ему: Аллилуиа.

Икос 9

Ветия многовещанныя не могут достойно глаголати о велией Твоей помощи всем, с верою к Тебе и Сыну Твоему прибегающым, в борьбе со своею плотию, соблазнами мира и духами злобы поднебесными изнемогающым, но надежду имущим на Тя и поющим Тебе сицевая:
Радуйся, свет людем во мраке греховнем возжигающая;
Радуйся, яко Тобою духовныма очима зрети горе научаемся.
Радуйся, премилосердная Мати всех сирот;
Радуйся, попечительнице вдовам честным.
Радуйся, наставнице богобоязненных пустынножителей;
Радуйся, благочестивых мирян вразумление.
Радуйся, на боголюбивыя с любовию взирающая;
Радуйся, нетленное богатство собирати им помогающая.
Радуйся, Премилосердная Богородице Дево, едина надеждо отчаянных, в борьбе со страстьми изнемогающих.

Кондак 10

Всех хощеши спасти, аще кто искренне желает спасения, но и оных, забывшых Бога и похотьми плотскими уловленных, призываеши болезньми и скорбьми к покаянию, сновидении и знамении их вразумляющи, да очнувшеся от сна греховнаго в покаянии слезном воззовут к Богу своему: Аллилуиа.

Икос 10

Стена еси Ты, Богородице Дево, всем, хотящым спасения, за неюже безопасно сохраняемся от стрел врагов видимых и невидимых, сего ради на всяком месте и во всякое время сего краткаго жития нашего, с любовию чтуще Тя, от всея души воспеваем Тебе сицевая:

Радуйся, мир и спокойствие нам дарующая;
Радуйся, божественною радостию души наша напояющая.
Радуйся, долготерпению нас научающая;
Радуйся, благочестием сердца наша исполняющая.
Радуйся, милосердие в нас утверждающая;
Радуйся, веру в нас укрепляющая.
Радуйся, кротости нас научающая;
Радуйся, воздержание в нас утверждающая.
Радуйся, Премилосердная Богородице Дево, едина надеждо отчаянных, в борьбе со страстьми изнемогающих.

Кондак 11

Пение всякое земнородных не может достойно прославити Твое, Царице Небесная, милосердие к роду христианскому, яко Ты, Всеблагая, не токмо жаждущым спасения, но и тем, кто потерял надежду на него, яко не в силах победити привычки своя греховныя, в великом томлении духа, унынии, отчаянии, омрачении ума, в ожесточении и окаменении сердечнем пребывающим, но Христа не отвергшимся, великое являеши вспоможение, со стоном сердечным взывающим к Тебе и Сыну Твоему: Аллилуиа.

Икос 11

Светоподательнице явилася еси Ты во тьме греховней блуждающым, да вси, иже из мрака греховнаго к свету выйти искренне желают, Тобою просвещеннии, возмогли бы неуклонно шествовати путем спасения, взирающе непрестанно духовныма очима горе и в радости поюще таковая:

Радуйся, яко тщеславным и гордым духовно ослепнути попущающая;
Радуйся, таковых временно ослепших верная хранительнице.
Радуйся, по испытании их вновь просвещающая;
Радуйся, искренним покаянием от тщеславия и гордости их избавляющая.
Радуйся, яко и смиренным ослепнути, да не возгордятся, попущающая;
Радуйся, хотящых зрячими быти по мере их смирения и подвигов исцеляющая.
Радуйся, ревность к подвигом в них распаляющая;
Радуйся, непрестанно молитися их научающая.

Радуйся, Премилосердная Богородице Дево, едина надеждо отчаянных, в борьбе со страстьми изнемогающих.

Кондак 12

Имаши власть от Бога вновь подавати нам благодать Сына Твоего, Владычице, юже мы в крещении получивше, утратили по множеству грехов своих, забывше обеты, нами Богу данныя, темже и ризу непорочности своея запятнав, нечуствием и омрачением одержимыя, токмо в Тебе, Всемилостивая, имамы неусыпную ходатаицу за род наш, заступающую всех, во отчаянии взывающих к Богу: Аллилуиа.

Икос 12

Поюще Чистейшую всех земнородных, Еяже смирение и непорочность соделали Ю достойным сосудом Духа Святаго и Материю Сына Божия, облеченную Пресвятою Троицею в славу Царицы неба и земли, мы, падшия и обремененныя грехми многими, не умея достойно восхвалити Тя, грешными устнами дерзаем воспевати Тебе сицевая:

Радуйся, кротосте, паче всякия кротости;
Радуйся, мудростию Своею всех мудрых превосходящая.
Радуйся, Игумения, всех ко спасению направляющая;
Радуйся, благоговейным пастырем стадо свое пасти помогающая.
Радуйся, духовным отцем грехопадения чад их, ко исправлению тех, открывающая;
Радуйся, чадам молитвами отцев их духовных милость Свою дарующая.
Радуйся, духовных отцев своих почитати с благоговением повелевающая;
Радуйся, Сама истинная Наставнице неимущим на земли духовных отцев и матерей.
Радуйся, Премилосердная Богородице Дево, едина надеждо отчаянных, в борьбе со страстьми изнемогающих.

Кондак 13

О, Премилосердная Богородице Дево! Пришедшим в безчувствие от лени, уныния и нерадения, всем отчаянным и надежду на исправление своей греховней жизни потерявшим, подаждь нечаянную радость духовную, и от окончательней погибели всех нас сохрани, наставляющи на путь спасения, да восчувствовав силу и крепость, Тобою Сыном Твоим нам дарованную, с радостию вопием всех благ Подателю Богу: Аллилуиа.

Кондак 13

О, Премилосердная Богородице Дево! Пришедшим в безчувствие от лени, уныния и нерадения, всем отчаянным и надежду на исправление своей греховней жизни потерявшим, подаждь нечаянную радость духовную, и от окончательней погибели всех нас сохрани, наставляющи на путь спасения, да восчувствовав силу и крепость, Тобою Сыном Твоим нам дарованную, с радостию вопием всех благ Подателю Богу: Аллилуиа.

Кондак 13

О, Премилосердная Богородице Дево! Пришедшим в безчувствие от лени, уныния и нерадения, всем отчаянным и надежду на исправление своей греховней жизни потерявшим, подаждь нечаянную радость духовную, и от окончательней погибели всех нас сохрани, наставляющи на путь спасения, да восчувствовав силу и крепость, Тобою Сыном Твоим нам дарованную, с радостию вопием всех благ Подателю Богу: Аллилуиа.

Икос 1

Ангели удивляются, Богородице Дево, Твоей неутомимой помощи грешним людем, жаждущым спасения, но от борьбы со страстьми, похотьми и соблазнами изнемогающым, с великою любовию ангельским языком славословят Тя, Пренепорочная:

Радуйся, святых ангелов служити грешным людям посылающая;
Pадуйся, Сама многажды чад Твоих немощных укрепляющая.
Радуйся, уныние от печальных сердец отгоняющая;
Радуйся, ленивых и нерадивых подвизатися ради Царствия Небеснаго заставляющая.
Радуйся, закоснелым в лени и в нерадении мучитися совестию допускающая;
Радуйся, во отчаяние пришедших, но Бога не разлюбивших, от окончательной гибели спасающая.
Радуйся, полчища бесовския, на них нападающия, вмиг разгоняющая;
Радуйся, яко Тобою и грешныя людие исправляются.
Радуйся, Премилосердная Богородице Дево, едина надеждо отчаянных, в борьбе со страстьми изнемогающих.

Кондак 1

Взбранной Воеводе Божией Матери и Небесной нашей покровительнице; вси в борьбе со страстьми, похотьми и соблазанами житейскими изнемогающыя, во уныние и отчаяние пришедшыя и плоды благодати Святаго Духа чрезмерною печалию изсушившия, но внезапно Царицею Небесною укрепленныя, радостно взывают:

Радуйся, Премилосердная Богородице Дево, едина надеждо отчаянных, в борьбе со страстьми изнемогающих.

Метки:

Pages: 1 2

Комментарии закрыты.