google-site-verification: google21d08411ff346180.html Слово огласительное во Святый и Светоносный день преславного и спасительного Христа Бога нашего Воскресения | Справочно-информационный портал Алчевского благочиния

Слово огласительное во Святый и Светоносный день преславного и спасительного Христа Бога нашего Воскресения

Апрель 4th 2010 -

Святой Иоанн Златоустый, архиепископ Константинопольский

(Чтется на утрени святой Пасхи, по целовании)

Аще кто благочестив и боголюбив, да насладится сего добраго и светлаго торжества.

Аще кто раб благоразумный, да внидет, радуяся, в радость Господа своего.

Аще кто потрудися постяся, да восприимет ныне динарий[1].

Аще кто от перваго часа делал есть, да приимет днесь праведный долг.

Аще кто по третием часе прииде, благодаря да празднует.

Аще кто по шестом часе достиже, ничтоже да сумнится, ибо ничимже отщетевается.

Аще кто лишися и девятаго часа, да приступит, ничтоже сумняся, ничтоже бояся.

Аще кто точию достиже и во единонадесятый час, да не устрашится замедления.

Любочестив бо Сый Владыка, приемлет последняго якоже и перваго: упокоевает во единонадесятый час пришедшаго, якоже делавшаго от перваго часа: и последняго милует, и первому угождает, и оному дает, и сему дарствует: и дела приемлет, и намерение целует, и деяние почитает, и предложение хвалит.

Темже убо внидите вси в радость Господа своего: и первии и втории, мзду приимите.

Богатии и убозии, друг со другом ликуйте.

Воздержницы и ленивии[2], день почтите.

Постившиися и непостившиися, возвеселитеся днесь.

Трапеза исполнена, насладитеся вси.

Телец упитанный[3], никтоже да изыдет алчай: вси насладитеся пира веры, вси восприимите богатство благости.

Никтоже да рыдает убожества, явися бо общее Царство.

Никтоже да плачет прегрешений, прощение бо от гроба возсия. Никтоже да убоится смерти, свободи бо нас Спасова смерть.

Угаси ю, Иже от нея держимый.

Плени ада, Сошедый во ад: огорчи его, вкусивша плоти Его.

И сие предприемый Исаия возопи: ад, глаголет, огорчися, срет Тя доле.

Огорчися, ибо упразднися.

Огорчися, ибо поруган бысть.

Огорчися, ибо умертвися.

Огорчися, ибо низложися.

Огорчися, ибо связася.

Прият тело, и Богу приразися.

Прият землю, и срете небо.

Прият еже видяше, и впаде во еже не видяше.

Где твое, смерте, жало?

Где твоя, аде, победа?

Воскресе Христос, и ты низверглся еси.

Воскресе Христос, и падоша демони.

Воскресе Христос, и радуются ангели.

Воскресе Христос, и жизнь жительствует.

Воскресе Христос, и мертвый ни един во гробе.

Христос бо, востав от мертвых, Начаток усопших бысть.

Тому слава и держава во веки веков. Аминь

Примечания:

[1] Динарий – римская монета. См. притчу о владельце виноградника и нанятых им работниках. Матф. 20, 1-16

[2] Ленивые, ραθυμοι – легкомысленные, а в против. воздержным — невоздержные

[3] Упитанный, πολυς, то есть велик, а не откормлен

Комментарии закрыты.