google-site-verification: google21d08411ff346180.html Молитва святому славному и всехвальному апостолу Христову Симону Зилоту, иже и Кананит именуется | Справочно-информационный портал Алчевского благочиния

Молитва святому славному и всехвальному апостолу Христову Симону Зилоту, иже и Кананит именуется

Май 22nd 2011 -

Молитва святому славному и всехвальному апостолу Христову Симону Зилоту, иже и Кананит именуется

Святый славный и всехвальный Апостоле Христов Симоне, сподобивыйся прияти в дом твой в Кане Галилейстей Господа нашего Иисуса Христа и Его Пречистую Матерь, Владычицу нашу Богородицу, и очевидцем быти преславнаго чудесе Христова, на браце твоем явленнаго, претворения воды в вино! Молим тя с верою и любовию: умоли Христа Господа претворити души наша из грехолюбивых в боголюбивыя: сохрани и соблюди нас молитвами твоими от искушений диавольских и падений греховных, и испроси нам свыше помощь во время уныния и безпомощия нашего: да не преткнемся о камень соблазна, но неуклонно шествуем спасительным путем заповедей Христовых, дондеже достигнем оных блаженных обителей райских, идеже ты ныне водворяешися и веселишися.

Ей, Апостоле Спасов! Не посрами нас, крепце на тя уповающих, но буди нам помощник и покровитель во всем житии нашем, и помози нам благочестно и богоугодно житие сие временное скончати, благую и мирную христианскую кончину получити и добраго ответа сподобитися на страшнем суде Христове, да, избежавше мытарств воздушных и власти лютаго миродержца, унаследуем Царство Небесное и прославим Великолепое имя Отца и Сына и Святаго Духа, во веки веков. Аминь. (Из Акафиста)

Тропарь, глас 3

Апостоле Святый Симоне, моли милостиваго Бога, да прегрешений оставление подаст душам нашим.

Симеону, сроднику Господню, сщмч., глас 1

Христова тя сродника, Симеоне священноначальниче, / и мученика тверда священно восхваляем, / прелесть потребившаго / и веру соблюдшаго. / Темже, днесь всесвятую твою память празднующе, / грехов разрешение молитвами твоими приемлем.

Кондак, глас 2

Известно премудрости учения в душах благочествующих положшаго во хвалении ублажим, яко Богоглаголиваго, вси Симона: Престолу бо Славы ныне предстоит и со Безплотными веселится, моляся непрестанно о всех нас.

Комментарии закрыты.