google-site-verification: google21d08411ff346180.html Молитва священномученику Филиппу, митрополиту Московскому и всея Руси, чудотворцу | Справочно-информационный портал Алчевского благочиния

Молитва священномученику Филиппу, митрополиту Московскому и всея Руси, чудотворцу

Июнь 13th 2014 -

Тропарь, глас 5

Радостный возсия день светлаго торжества: днесь церковная расширяются недра, приемлюще духовных даров неоскудеемо боготворное сокровище, струю благодатей неисчерпаемую, источника чудесе обильна, чудотворивыя и священныя мощи твоя, святителю Филиппе. Тем же моли Прославившаго тя Дарователя Христа Бога о воспевающих тя и кланяющихся священным мощем твоим.

Кондак, глас 3

Яко солнце, днесь от земных недр возсияша честныя твоя мощи, святителю. Землю же и воздух шествием твоим осветил еси и всех верных чудес богознаменьми облистал еси, чудотворец предивен и молитвенник к Богу о мире изящен явися. Сего ради вопием ти: спасай нас теплым своим предстательством, яко ученик Божия Благодати.

Молитва

О пречестная и священная главо и Благодати Святого Духа исполненная, Спасово со Отцем обиталище, великий архиерее, теплый наш заступниче, святителю Филиппе! Предстоя у Престола всех Царя и наслаждаяся Света Единосущныя Троицы, и херувимски со Ангелы возглашая песнь Трисвятую, великое и неизследованное дерзновение имея ко Всемилостивому Владыце, молися паствы Христовы спасти люди, благостояние святых церквей утверди, архиереи благолепием святительства украси, монашествующих к подвигам добраго течения укрепи, град Москву и вся грады и страны добре сохрани и веру святую непорочно соблюсти умоли. Мир весь умири, от глада и пагубы избави ны и от нападения иноплеменных сохрани, старыя утеши, юныя накажи, безумныя умудри, вдовицы помилуй, сироты заступи, младенцы возрасти, плененныя возврати, немощствующия исцели и везде тепле призывающих тя и с верою притекающих к тебе и усердно припадающих и молящихся от всяких напастей и бед ходатайством твоим свободи. Моли о нас Всещедраго и Человеколюбиваго Христа Бога нашего, да и в день страшнаго пришествия Его шуияго стояния избавит ны и радости святых причастники сотворит со всеми святыми во веки. Аминь.

Источник: «Жития русских святых. В 2 томах. Том 1: Март-август»

Комментарии закрыты.