google-site-verification: google21d08411ff346180.html Молитва Пресвятой Богородице перед Ея иконой, именуемой «Белыничская» | Справочно-информационный портал Алчевского благочиния

Молитва Пресвятой Богородице перед Ея иконой, именуемой «Белыничская»

Апрель 25th 2015 -

Белыничская икона Божией Матери Абраз XVII–ХIX стст. Нацыянальны мастацкі музей РБ

Тропарь, глас 5

Радуйся, могилевская земле, слава бо Господня на тебе возсия; взыграйте, холми белынические, веселием, прославися бо тамо икона Богоматери; ликуйте, людие, и веселитеся, богатство бо неоскудное даровася нам, исцелений сокровище. гласы якоже трубы возшумите, прославляюще чудеса Владычицы преславно: радуйся, Богородице Дево, от Белыническия иконы божественный свет и чудеса нам источающая.

Кондак, глас 4

Взбранной Воеводе победительная, яко избавльшеся от злых, пришествием Твоего честнейшаго образа Владычице Богородице, светло сотворяем празднество иконы Твоея Белыничския и зовем Ти Богородице: радуйся, Невесто Неневестная.

Молитва

О всемилостивая Госпоже Царице Богородице, от всех родов избранная и всеми роды земными и небесными ублажаемая! припадаем, покланяемся Тебе и смиренно молим Тя: воззри милостиво на предстоящия пред святым образом Твоим чудотворным и приими молитвы, со слезами Тебе приносимыя от нас, недостойных рабов Твоих, и к Твоему образу пение возсылаемое со умилением, яко Тебе самой ту сущей, послушающей и подающей с верою просящим по коемуждо прошению исполнение.

Ты, именуемая Всех Скорбящих Радость, услыши нас, скорбных. Ты, называемая Утоли Моя Печали, утоли нашу печаль. Ты, Купино Неопалимая, сохрани мир и всех нас от вредоносных огненных стрел врага. Ты, Взыскание погибших, не попусти нам погибнути в бездне грехов наших. Ты, Одигитрие, укажи нам правый путь ко спасению. Ты, Неувядаемый Цвете Чистоты, даждь нам помощь, немощным плотскою страстию, и уцеломудри нас. Ты, Боголюбивая Скоропослушнице, услыши в час сей молитву нашу. Ты, Заступнице Усердная, Мати Господа Вышняго, Ты, наша Мати и Надеждо, облегчи скорбь нашу, немощным здравие даруй, разслабленных и недужных исцели и от одра болезни возстави. От бесных бесы отгони, обидимых от бед избави, вдов защити, грешныя прости, прокаженныя очисти, слепым зрение даруй, старость поддержи, юныя настави, малыя дети помилуй, неплодны от неплодства разреши, в семействах мир утверди, путешествующим спутешествуй, православным христианом на враги победу и одоление даруй, ереси и расколы изкорени, отпадшия от благочестивыя веры на путь правый обрати, страну нашу миром огради, земли плодородие даруй, всех же нас от внезапныя смерти сохрани и всякия многоразличныя страсти уврачуй, вся бо возможеши ходатайством к Сыну Твоему Христу Богу нашему.

О Всепетая Мати, Пресвятая Дево Богородице, не престани молитися о нас, недостойных, к пречистому образу твоему со умилением при падающих и со страхом и любовию на сей взирающих, яко живей Ти сущей. Услыши нас, Владычице, на Тя по Бозе едину надежду имущих. Прежде отшедшия отцы и матери, братию и сестры наша упокой в селениях святых, в месте светле, в месте злачне, в месте покойне, идеже несть печаль и воздыхание.

Егда же приспеет и наше от жития сего отшествие и к вечней жизни преселение, предстани нам, Преблагословенная Надеждо наша, даруй нам христианскую кончину живота нашего, безболезненну, непостыдну, мирну и святых тайн причастну, да в будущем веце сподобимся вси купно со всеми святыми безконечныя блаженныя жизни во Царствии возлюбеннаго Сына Твоего Иисуса Христа, Емуже подобает всякая слава, честь и поклонение со Безначальным Его Отцем и Пресвятым, и Благим, и Животворящим Его Духом ныне и присно и во веки веков. Аминь.

128

Метки:

Комментарии закрыты.