google-site-verification: google21d08411ff346180.html Молитва преподобному Макарию, игумену Калязинскому, чудотворцу | Справочно-информационный портал Алчевского благочиния

Молитва преподобному Макарию, игумену Калязинскому, чудотворцу

Март 26th 2016 -

Преподобный Макарий, игумен Калязинский

О священная главо, преподобне отче, преблаженне авво Макарие! Не забуди убогих своих до конца, но поминай нас во святых своих и благоприятных молитвах к Богу.

Помяни стадо свое, еже сам упасл еси, и не забуди посещати чад своих. Моли за ны, отче священный, за дети своя духовныя, яко имея дерзновение к Небесному Царю. Не промолчи за ны ко Господу, и не презри нас, верою и любовию чтущих тя. Поминай нас, недостойных, у Престола Вседержителева, и не престай моляся о нас ко Христу Богу: ибо дана тебе бысть благодать за ны молитися. Не мним бо тя суща мертва: аще бо и телом преставился еси от нас, но и по смерти жив сый пребываеши. Не отступай от нас духом, сохраняя нас от стрел вражиих, и всякия прелести бесовския, и козней диавольских, пастырю наш добрый. Аще бо и мощей твоих рака пред очима нашима видима есть всегда, но святая твоя душа с ангельскими воинствы, с безплотными лики, с Небесными Силами у Престола Вседержителева предстоящи, достойно веселится. Ведуще бо тя воистину и по смерти жива суща, тебе припадаем и тебе молимся: еже молитися о нас Всесильному Богу о пользе душ наших и испросити время на покаяние, и о невозбранном преитии от земли на Небо, мытарств же горьких, бесов воздушных князей и вечныя муки избавитися, и Небесному Царствию наследником быти со всеми праведными, от века угодившими Господу нашему Иисусу Христу: Емуже подобает всякая слава, честь и поклонение со Безначальным Его Отцом, и Пресвятым и Благим и Животворящим Его Духом, ныне и присно, и во веки веков. Аминь.

Оставьте комментарий!