google-site-verification: google21d08411ff346180.html Молитва преподобному и Богоносному Исаакию исповеднику, игумену Далматскому | Справочно-информационный портал Алчевского благочиния

Молитва преподобному и Богоносному Исаакию исповеднику, игумену Далматскому

Июнь 12th 2020 -

преподобный Исаакий Далматский

Тропарь, глас 3.

О́браз бы́л еси́ воздержа́ния и утвержде́ние Це́ркве,/ Исаа́кие, отце́в украше́ние,/ доброде́тельми бо украси́л еси́ житие́ твое́,/ Правосла́вия сло́во уясни́л еси́./ О́тче преподо́бне,/ Христа́ Бо́га моли́// дарова́ти на́м ве́лию ми́лость.

Кондак, глас 8.

Я́ко преподо́бных пра́вило изве́стнейшее/ и благоче́стия яви́теля де́тельнейшаго/ воспева́ем тя́, раби́ твои́, богоно́сне./ Но я́ко благода́ти боже́ственныя пребыва́лище,/ хра́мы соде́лай на́с све́та Духо́внаго, вопию́щих ти́:// Ра́дуйся, о́тче Исаа́кие.

Тропарь, глас 4*:

От гонитель и законопреступник злых царь удалився в пустыню, но Богови близ мольбу принося, дивный Исаакие, богопослан быв во царствиа град во отверзение Христовых церквей и от негоже крыяся, сему с дерзновениемъ бразды коню удержав, и в кал ввержен быв, вторицею то же сотвори, со иже от Бога данным ти пророчеством, и в темницы по Христе претерпев, ныне же в Небеснем Царствии у Христа веселишися, Егоже моли избавити ны от всяких скорбей душевных и телесных!

Кондак, глас 4*:

Злочестивому цареви прорекий сожжену быти в плевницы за противление богоповеленных ти словес речения, и в темницы же о благовернем Феодосии цари прорече, от негоже в место темница и почесть земну восприим, от Христа же нетлеемую в веки почесть улучив, чудный Исаакие!

Молитва*

Православия ревнителю и ереси обличителю, Церкве поборниче и иноков похвало, преподобне отче наш Исаакие! К тебе во умилении сердец наших притекаем и твоея помощи ко спасению нашему просим. Ты бо пророку Божию Илии поревновал еси и царя злочестиваго небоязненно обличил еси: ты к познанию веры Православныя того увещевал еси и от него поругания и злострадания радуяся претерпел еси. Вразуми убо и нас молитвами твоими Евангельское благовестие неизменно соблюдати и всякой ереси противостояти, искушением же от многострастныя плоти нашея, от мира сего и от диавола бывающим противитися. Научи нас во храмех Божиих неленостно собиратися и по вся дни покаяние Господеви приносити. Веруем и уповаем, угодниче Божий, яко не вотще благолепнейшая во стране Российстей церковь в царствующем граде [нашем] волею Божиею во твое имя создася, но да вси православнии, от всея страны нашея во храм сей притекающии, на подвиг твой взирающе, вере твоей подражают. Испроси убо, преподобне отче Исаакие, благоверному Царю нашему здравие и спасение, на супостаты же одоление, пастырем Церкве о спасении верных ревность, всем же православным христианом в вере единомыслие и в любви преспеяние, усопшим же блаженное упокоение, да сия вся молитвами твоими восприемлюще, купно с тобою прославим Бога, дивнаго во святых Своих, в Троице славимаго, Отца и Сына и Святаго Духа, ныне и присно и во веки веков. Аминь.

*Богослужебные тексты в честь преп. Исаакия заимствованы из двух источников: тропарь и кондак, составленные русским духовным писателем XVI века протопопом Ермолаем, во иночестве Еразмом, воспроизводятся по автографу автора — РНБ, Софийское собрание, №1296, лл. 265об. – 266; молитва воспроизводится по сборнику «Молитвы Господу Богу, Пресвятей Богородице и святым угодником Божиим, чтомыя на молебнех и иных последованиих» (Пг.: Синодальная типография, 1915), л. 179 об.

источник

Комментарии закрыты.