google-site-verification: google21d08411ff346180.html Молитва преподобнаго Германа Зосимовскаго | Справочно-информационный портал Алчевского благочиния

Молитва преподобнаго Германа Зосимовскаго

Июль 16th 2016 -

Преподобный Герман Зосимовский

Тропарь, глас 8:

Непрестанныя молитвы добрый ревнителю,/ святыя пустыни мудрый устроителю,/ богомыслия и старчества в ней насадителю,/ добродетельми многими, яко ризою украшенный,/ постническое житие явивый, преподобне отче Германе,/ приими нас, чтущих любовию честную память твою,/ да отвергнем льстивую прелесть мира сего/ теплым предстательством твоим у Престола Вседержителя.

Кондак, глас 6:

В преподобстве и правде мужественне пожив,/ пустынножителю, отче Германе,/ многим путь ко спасению,/ яко звезда пресветлая, озарил еси/ и, всем быв для всех,/ Богу и людем усердно послужил еси.

Молитва

О, блаженне отче Германе! Земли Владимирския преславная похвало, чудный угодниче Христов и иноков дивное украшение!

Зряще обитель Зосимову, стопами многих подвижников освященную, ныне же зрак свой обновившую, таже и святыя мощи твоя обретшую, радуемся ея восходу новому. Темже достойно воспеваем тя, отче Германе, яко строителя обители мудраго, наставника монахов неусыпнаго, общаго жития ревностнаго насадителя, непрестанныя молитвы учителя, святых икон искуснаго изографа и старца милостиваго.

Ты, о летех скорбных пастырски воздыхая, молитвою и советом многия верныя люди укреплял еси. Ныне же, благодатию свыше облагоуханный, во Царствии Небеснем престолу Божию предстоя, молися о нас, грешных, в страстех мнозех пребывающих, и о умирении во вражде сущих, да озарит Господь светом покаяния и исправления житие наше, да с любовию прославим Пречестное и Великолепое Имя Отца и Сына и Святаго Духа во веки веков. Аминь.

Метки:

Оставьте комментарий!