google-site-verification: google21d08411ff346180.html Молитва ко Пресвятой Богородице пред Ее иконою «Муромская» | Справочно-информационный портал Алчевского благочиния

Молитва ко Пресвятой Богородице пред Ее иконою «Муромская»

Март 24th 2011 -

Молитва ко Пресвятой Богородице пред Ее иконою «Муромская»

О Пресвятая Дево, Мати Господа Вышних сил, Небесе и земли Царице, града и страны нашея Всемощная Заступнице! Услыши нас, молящихся Тебе, и испроси у Бога, Сына Твоего, пастырем нашим ревность и бдение о душах, градоправителем — мудрость и силу, судиям — правду и нелицеприятие, наставником — разум и смиренномудрие, супругом — любовь и согласие, чадом — послушание, обидимым — терпение, обидящим — страх Божий, скорбящим — благодушие, радующимся — воздержание. Нам же всем ниспосли дух разума и благочестия, дух милосердия и кротости, дух чистоты и правды. Ей, Госпоже Пречистая! умилосердися на немощныя люди Твоя: разсеянныя собери, заблуждшия на путь правый настави, недугующия уврачуй, старость поддержи, юныя уцеломудри, младенцы воспитай и призри на всех нас призрением милостиваго Твоего заступления. Милостива нам буди зде и на Страшнем Суде Сына Твоего. Ты бо еси, Госпоже, слава Небесных и упование земных, Ты по Бозе наша надежда и Заступница всех, притекающих к Тебе с верою. Тебе убо молимся и Тебе, яко Всемогущей Помощнице, сами себе и друг друга и всю жизнь нашу предаем, ныне, и присно, и во веки веков. Аминь.

Тропарь, глас 4

Днесь светло красуется град Муром, яко зарю солнечную, восприемши, Владычице, чудотворную Твою икону, к нейже ныне мы притекающе и молящеся, Тебе взываем сице: о Пречудная Владычице Богородице, молися из Тебе воплощенному Христу Богу нашему, да избавит град сей и вся грады и страны христианския невредимы от всех навет вражиих и спасет души наша, яко Милосерд.

Величание

Величаем Тя, Пресвятая Дево, и чтим образ Твой святый, имже болезни наша врачуеши и души к Богу возводиши.

Комментарии закрыты.