Молитва ко Пресвятой Богородице перед Ея иконой, именуемой «Моздокская»
Май 3rd 2011 -
Молитва ко Пресвятой Богородице перед Ея иконой, именуемой «Моздокская»
О, Всемилостивая Госпоже Дево Богородице, услыши нас молящихся Тебе, и яви нам скорую милость Твою, Моли Сына Твоего избавитися нам от всякаго зла и сохрани люди, благочестно прибегающия и призывающия имя Твое святое, от всякия напасти, всех нас сохраняющи под кровом благости Твоея, ризою Твоею честною защити. Призри на всех нас призрением милостиваго Твоего заступления и молитвою Твоею сподоби нас со Христом жити и радости ангельския в небесных селениих наслаждатися.
Ты бо еси, Госпоже, Слава небесных и Упование земных. Ты наша Надежда и Заступница всех, притекающих к Тебе и Твоея святыя помощи просящих, тем же всечестный образ Твой и рукою Твоею Держимаго Вседержителя видяще на иконе, радуемся грешнии, со умилением припадаем и любовию сей целуем, чающе, Госпоже, Твоими богоприятными молитвами в мире и благочестии земный путь прейти и небесныя безконечныя жизни достигнути и Трисиянному Богу со всеми, угодившими Ему, поклонятися во веки веков. Аминь.
Величание
Величаем Тя, Пресвятая Дево, и чтим образ Твой святый, имже болезни наша врачуеши и души к Богу возводиши.
Молитвы Богородице можно прчитать по ссылке
