Акаѳистъ Пресвятѣй Богородицѣ «Невѣсто неневѣстная»

Май 24th 2011 -

Акаѳистъ Пресвятѣй Богородицѣ «Невѣсто неневѣстная»

Кондакъ 1.

Взбранной Воеводѣ побѣдительная, яко избавльшеся отъ злыхъ, благодарственная восписуемъ Ти раби Твои, Богородице: но яко имущая державу непобѣдимую, отъ всякихъ насъ бѣдъ свободи, да зовемъ Ти: Радуйся, Невѣсто Неневѣстная.


Икосъ 1.
Ангелъ предстатель съ небесе посланъ бысть рещи Богородицѣ: радуйся, и со безплотнымъ гласомъ воплощаема Тя зря, Господи, ужасашеся и стояше, зовый къ Ней таковая:
Радуйся, Еюже радость возсіяетъ: радуйся, Еюже клятва исчезнетъ.
Радуйся, падшаго Адама воззваніе: радуйся, слезъ Евиныхъ избавленіе.
Радуйся, высото, неудобовосходимая человѣческими помыслы: радуйся глубино, неудобозримая и Ангельскима очима.
Радуйся, яко еси Царево сѣдалище: радуйся, яко носиши Носящаго вся.
Радуйся, звѣздо, являющая Солнце: радуйся, утробо Божественнаго воплощенія.
Радуйся, Еюже обновляется тварь: радуйся, Еюже покланяемся Творцу.
Радуйся, Невѣсто Неневѣстная.

Кондакъ 2.
Видящи Святая Себе въ чистотѣ, глаголетъ Гавріилу дерзостно: преславное твоего гласа, неудобопріятельно души Моей является: безсѣменнаго бо зачатія рождество како глаголеши? зовый: Аллилуіа.

Икосъ 2.
Разумъ недоразумѣваемый разумѣти Дѣва ищущи, возопи къ служащему: изъ бокý чисту, Сыну како есть родитися мощно, рцы ми? къ Нейже онъ рече со страхомъ, обаче зовый сице:
Радуйся, совѣта неизрѣченнаго таѝннице: радуйся, молчанія просящихъ вѣро.
Радуйся, чудесъ Христовыхъ начало: радуйся, велѣній Его главизно.
Радуйся лѣствице небесная, еюже сниде Богъ: радуйся, мосте, преводяй сущихъ отъ земли на небо.
Радуйся, Ангеловъ многословущее чудо: радуйся, бѣсовъ многоплачевное пораженіе.
Радуйся, Свѣтъ неизрѣченно родившая: радуйся, еже како, ни единаго же научившая.
Радуйся, премудрыхъ превосходящая разумъ: радуйся, вѣрныхъ озаряющая смыслы.
Радуйся, Невѣсто Неневѣстная.

Кондакъ 3.
Сила Вышняго осѣни тогда къ зачатію Браконеискусную, и благоплодная Тоя ложесна, яко село показа сладкое, всѣмъ хотящымъ жати спасеніе, внегда пѣти сице: Аллилуіа.

Икосъ 3.
Имущи Богопріятную Дѣва утробу, востече ко Елисавети; младенецъ же оноя абіе познавъ сея цѣлованіе, радовашеся, и играньми яко пѣсньми вопіяше къ Богородицѣ:
Радуйся, отрасли неувядаемыя розгó: радуйся, плода безсмертнаго стяжаніе.
Радуйся, дѣлателя дѣлающая Человѣколюбца: радуйся, Садителя жизни нашея рождшая.
Радуйся, ниво, растящая гобзованіе щедротъ: радуйся, трапезо, носящая обиліе очищенія.
Радуйся, яко рай пищный процвѣтаеши: радуйся, яко пристанище душамъ готовиши.
Радуйся, пріятное молитвы кадило: радуйся, всего міра очищеніе.
Радуйся, Божіе ко смертнымъ благоволеніе: радуйся, смертныхъ къ Богу дерзновеніе.
Радуйся, Невѣсто Неневѣстная.

Кондакъ 4.
Бурю внутрь имѣя помышленій сумнительныхъ, цѣломудренный Іосифъ смятеся, къ Тебѣ зря небрачнѣй, и бракоокрадованную помышляя, Непорочная: увѣдѣвъ же Твое зачатіе отъ Духа Свята, рече: Аллилуіа.

Икосъ 4.
Слышаша пастыріе Ангеловъ поющихъ плотское Христово пришествіе, и текше яко къ Пастырю, видятъ сего, яко агнца непорочна, во чревѣ Маріинѣ упáсшася, Юже поюще, рѣша:
Радуйся, Агнца и Пастыря Мати: радуйся, двóре словесныхъ овецъ.
Радуйся, невидимыхъ враговъ мученіе: радуйся, райскихъ двéрей отверзеніе.
Радуйся, яко небесная срадуются земнымъ: радуйся, яко земная сликовствуютъ небеснымъ.
Радуйся, Апостоловъ немолчная уста: радуйся, страстотерпцевъ непобѣдимая дерзосте.
Радуйся, твердое вѣры утвержденіе: радуйся, свѣтлое благодати познаніе.
Радуйся, Еюже обнажися адъ: радуйся, Еюже облекохомся славою.
Радуйся, Невѣсто Неневѣстная.

Кондакъ 5.
Боготечную звѣзду узрѣвше волсвѝ, тоя послѣдоваша зари: и яко свѣтильникъ держаще ю, тою испытаху крѣпкаго Царя: и достигше непостижимаго, возрадовашася, Ему вопіюще: Аллилуіа.

Икосъ 5.
Видѣша отроцы Халдейстіи на рукý Дѣвичу, создавшаго руками человѣки, и Владыку разумѣвающе Его, аще и рабій пріятъ зракъ, потщашася дармѝ послужити Ему, и возопити Благословеннѣй:
Радуйся, звѣзды незаходимыя Мати: радуйся, заре тáинственнаго дне.
Радуйся, прелести пещь угасившая: радуйся, Троицы таѝнники просвѣщающая.
Радуйся, мучителя безчеловѣчнаго изметающая отъ начальства: радуйся, Господа Человѣколюбца показавшая Христа.
Радуйся, варварскаго избавляющая служенія: радуйся, тимѣнія изъимающая дѣлъ.
Радуйся, огня поклоненіе угасившая: радуйся, пламене страстей измѣняющая.
Радуйся, вѣрныхъ наставнице цѣломудрія: радуйся, всѣхъ родовъ веселіе.
Радуйся, Невѣсто Неневѣстная.

Кондакъ 6.
Проповѣдницы Богоносніи бывше волсвѝ, возвратишася въ Вавилонъ, скончавше Твое пророчество: и проповѣдавше Тя Христа всѣмъ, оставиша Ирода яко буесловяща, невѣдуща пѣти: Аллилуіа.

Икосъ 6.
Возсіявый во Египтѣ просвѣщеніе истины, отгналъ еси лжи тму: идоли бо его, Спáсе, не терпяще Твоея крѣпости, падоша: сихъ же избавльшіися вопіяху къ Богородицѣ:
Радуйся, исправленіе человѣковъ: радуйся, низпаденіе бѣсовъ.
Радуйся, прелести державу поправшая: радуйся, идольскую лесть обличившая.
Радуйся, море, потопившее фараона мысленнаго: радуйся, каменю, напоившій жаждущыя жизни.
Радуйся, огненный столпе, наставляяй сущыя во тмѣ: радуйся, покрове міру, ширшій облака.
Радуйся, пище, манны пріемнице: радуйся, сладости святыя служительнице.
Радуйся, земле обѣтованія: радуйся, изъ неяже течетъ медъ и млеко.
Радуйся, Невѣсто Неневѣстная.

Кондакъ 7.
Хотящу Симеону отъ нынѣшняго вѣка преставитися прелестнаго, вдался еси яко младенецъ тому, но познался еси ему и Богъ совершенный: тѣмже удивися Твоей неизрѣченнѣй премудрости, зовый: Аллилуіа.

Икосъ 7.
Новую показа тварь, явлься Зиждитель, намъ отъ Него бывшымъ, изъ безсѣменныя прозябъ утробы, и сохранивъ ю, якоже бѣ, нетлѣнну, да чудо видяще, воспоѝмъ ю, вопіюще:
Радуйся, цвѣте нетлѣнія: радуйся, вѣнче воздержанія.
Радуйся, воскресенія образъ облистающая: радуйся, Ангельское житіе являющая.
Радуйся, древо свѣтлоплодовитое, отъ негоже питаются вѣрніи: радуйся, древо благосѣннолиственное, имже покрываются мнози.
Радуйся, во чревѣ носящая Избáвителя плѣненнымъ: радуйся, рождшая Наставника заблуждшымъ.
Радуйся, Судіи Праведнаго умоленіе: радуйся, многихъ согрѣшеній прощеніе.
Радуйся, одеждо нагихъ дерзновенія: радуйся, любы всяко желаніе побѣждающая.
Радуйся, Невѣсто Неневѣстная.

Кондакъ 8.
Странное рождество видѣвше, устранимся міра, умъ на небеса преложше: сего бо ради высокій Богъ на земли явися смиренный человѣкъ, хотяй привлещи къ высотѣ, Тому вопіющыя: Аллилуіа.

Икосъ 8.
Весь бѣ въ нижнихъ, и вышнихъ никакоже отступи неописанное Слово: снисхожденіе бо Божественное, не прехожденіе же мѣстное бысть, и рождество отъ Дѣвы Богопріятныя, слышащія сія:
Радуйся, Бога невмѣстимаго вмѣстилище: радуйся, честнáго тáинства двери.
Радуйся, невѣрныхъ сумнительное слышаніе: радуйся, вѣрныхъ извѣстная похвало.
Радуйся, колеснице пресвятая Сущаго на Херувимѣхъ: радуйся, селеніе преславное Сущаго на Серафимѣхъ.
Радуйся, противная въ тожде собравшая: радуйся, дѣвство и рождество сочетавшая.
Радуйся, Еюже разрѣшися преступленіе: радуйся, Еюже отвéрзеся рай.
Радуйся, ключý Царствія Христова: радуйся, надеждо благъ вѣчныхъ.
Радуйся, Невѣсто Неневѣстная.

Кондакъ 9.
Всякое естество Ангельское удивися великому Твоего вочеловѣченія дѣлу: неприступнаго бо яко Бога, зряше всѣмъ приступнаго Человѣка, намъ убо спребывающа, слышаща же отъ всѣхъ: Аллилуіа.

Икосъ 9.
Вѣтія многовѣщанныя, яко рыбы безгласны видимъ о Тебѣ, Богородице: недоумѣваютъ бо глаголати: еже како и Дѣва пребываеши, и родити возмогла еси, мы же тáинству дивящеся, вѣрно вопіемъ:
Радуйся, премудрости Божія пріятелище: радуйся, промышленія Его сокровище.
Радуйся, любомудрыя немудрыя являющая: радуйся, хитрословесныя безсловесныя обличающая.
Радуйся, яко обуяша лютіи взыскателе: радуйся, яко увядоша баснотворцы.
Радуйся, Аѳинейская плетенія растерзающая: радуйся, рыбарскія мрежи исполняющая.
Радуйся, изъ глубины невѣдѣнія извлачающая: радуйся, многи въ разумѣ просвѣщающая.
Радуйся, кораблю хотящихъ спастися: радуйся, пристанище житейскихъ плаваній.
Радуйся, Невѣсто Неневѣстная.

Кондакъ 10.
Спасти хотя міръ, иже всѣхъ Украсѝтель, къ сему самообѣтованъ пріиде, и Пастырь сый яко Богъ, насъ ради явися по намъ человѣкъ: подобнымъ бо подобное призвавъ, яко Богъ слышитъ: Аллилуіа.

Икосъ 10.
Стѣна еси дѣвамъ, Богородице Дѣво, и всѣмъ къ Тебѣ прибѣгающымъ: ибо небесе и земли Творецъ устрóи Тя, Пречистая, вселься во утробѣ Твоей, и вся приглашати Тебѣ научивъ:
Радуйся, стóлпе дѣвства: радуйся, дверь спасенія.
Радуйся, начальнице мысленнаго назданія: радуйся, подательнице Божественныя благости.
Радуйся, Ты бо обновила еси зачатыя студно: радуйся, Ты бо наказала еси окраденныя умомъ.
Радуйся, тлителя смысловъ упражняющая: радуйся, Сѣятеля чистоты рождшая.
Радуйся, чертóже безсѣменнаго уневѣщенія: радуйся, вѣрныхъ Гóсподеви сочетавшая.
Радуйся, добрая младопитательнице дѣвамъ: радуйся, невѣстокрасительнице душъ святыхъ.
Радуйся, Невѣсто Неневѣстная.

Кондакъ 11.
Пѣніе всякое побѣждается, спростретися тщащееся ко множеству многихъ щедротъ Твоихъ: равночисленныя бо песка пѣсни аще приносимъ Ти, Царю Святый, ничтоже совершаемъ достойно, яже далъ еси намъ, Тебѣ вопіющымъ: Аллилуіа.

Икосъ 11.
Свѣтопріемную свѣщу, сущымъ во тмѣ явльшуюся, зримъ Святую Дѣву: невещественный бо вжигающи огнь, наставляетъ къ разуму Божественному вся, зарею умъ просвѣщающая, званіемъ же почитаемая, сими:
Радуйся, лучé умнаго солнца: радуйся, свѣтило Незаходимаго Свѣта.
Радуйся, молніе, душы просвѣщающая: радуйся, яко громъ враги устрашающая.
Радуйся, яко многосвѣтлое возсіяваеши просвѣщеніе: радуйся, яко многотекущую источаеши рѣку.
Радуйся, купѣли живописующая образъ: радуйся, грѣховную отъемлющая скверну.
Радуйся, бане, омывающая совѣсть: радуйся, чаше, черплющая радость.
Радуйся, обоняніе Христова благоуханія: радуйся, животе тайнаго веселія.
Радуйся, Невѣсто Неневѣстная.

Кондакъ 12.
Благодать дати восхотѣвъ, долговъ древнихъ, всѣхъ долговъ Рѣшитель человѣкомъ, пріиде Собою ко отшедшымъ Того благодати: и раздравъ рукописаніе, слышитъ отъ всѣхъ сице: Аллилуіа.

Икосъ 12.
Поюще Твое рождество, хвáлимъ Тя вси, яко одушевленный храмъ, Богородице: во Твоей бо вселився утробѣ, содержай вся рукою Господь, освяти, прослави и научи вопити Тебѣ всѣхъ:
Радуйся, селеніе Бога и Слова: радуйся, Святая святыхъ бóльшая.
Радуйся, ковчеже позлащенный Духомъ: радуйся, сокровище живота неистощимое.
Радуйся, честный вѣнче царей благочестивыхъ: радуйся, честнáя похвало іереевъ благоговѣйныхъ.
Радуйся, Церкве непоколебимый стóлпе: радуйся, Царствія нерушимая стѣно.
Радуйся, Еюже воздвижутся побѣды: радуйся, Еюже низпáдаютъ врази.
Радуйся, тѣла моего врачеваніе: радуйся, душѝ моея спасеніе.
Радуйся, Невѣсто Неневѣстная.

Кондакъ 13.
О всепѣтая Мати, рождшая всѣхъ святыхъ Святѣйшее Слово! нынѣшнее пріемши приношеніе, отъ всякія избави напасти всѣхъ, и будущія изми муки Тебѣ вопіющихъ: Аллилуіа. Трижды.
И паки чтется первый икосъ: Ангелъ Предстатель… И кондакъ первый: Взбранной Воеводѣ…

Источникъ: Акаѳісты съ каноны и прочая душеполезная моленія. — Изданіе первое, съ шестнадцатью священными изображеніями. — СПб.: Въ Сѵнодальной Тѵпографіи, 1887. — С. 16-36.

Комментарии закрыты.