google-site-verification: google21d08411ff346180.html Ака́ѳистъ [слу́жба съ ака́ѳистомъ] Пресвятѣ́й Влады́чицѣ на́шей Богоро́дицѣ и Приснодѣ́вѣ Марíи | Справочно-информационный портал Алчевского благочиния

Ака́ѳистъ [слу́жба съ ака́ѳистомъ] Пресвятѣ́й Влады́чицѣ на́шей Богоро́дицѣ и Приснодѣ́вѣ Марíи

Октябрь 28th 2011 -

А́ще іере́й, глаго́летъ:
Благослове́нъ Бо́гъ на́шъ, [всегда́, ны́нѣ и при́сно и во вѣ́ки вѣко́въ].

А́ще ли не свяще́нный, глаго́летъ:
Моли́твами святы́хъ оте́цъ на́шихъ, Го́споди Іису́се Христе́, Бо́же на́шъ, поми́луй на́съ. Ами́нь.

И мы́ глаго́лемъ:
Сла́ва Тебѣ́, Бо́же на́шъ, сла́ва Тебѣ́.
Царю́ Небе́сный: Трисвято́е. И по О́тче на́шъ...

Тропари́ сія́, гла́съ 6:

Поми́луй на́съ, Го́споди, поми́луй на́съ; вся́каго бо отвѣ́та недоумѣ́юще, сію́ Ти́ моли́тву я́ко Влады́цѣ грѣ́шніи прино́симъ: поми́луй на́съ.

Сла́ва: Го́споди, поми́луй на́съ, на Тя́ бо упова́хомъ; не прогнѣ́вайся на ны́ зѣло́, ниже́ помяни́ беззако́ній на́шихъ, но при́зри и ны́нѣ я́ко благоутро́бенъ, и изба́ви ны́ отъ вра́гъ на́шихъ; Ты́ бо еси́ Бо́гъ на́шъ, и мы́ лю́діе Твои́, вси́ дѣла́ руку́ Твое́ю, и и́мя Твое́ призыва́емъ.

И ны́нѣ: Милоcе́рдія две́ри отве́рзи на́мъ, благослове́нная Богоро́дице, надѣ́ющіися на Тя́ да не поги́бнемъ, но да изба́вимся Тобо́ю отъ бѣ́дъ: Ты́ бо еси́ спасе́іе ро́да христіа́нскаго.

Вѣ́рую во еди́наго Бо́га Отца́, Вседержи́теля, Творца́ не́бу и земли́, ви́димымъ же всѣ́мъ и неви́димымъ. И во еди́наго Го́спода Іису́са Христа́, Сы́на Бо́жія, Единоро́днаго, И́же отъ Отца́ рожде́ннаго пре́жде всѣ́хъ вѣ́къ; Свѣ́та отъ Свѣ́та, Бо́га и́стинна отъ Бо́га и́стинна, рожде́нна, не сотворе́нна, единосу́щна Отцу́, И́мже вся́ бы́ша. На́съ ра́ди человѣ́къ и на́шего ра́ди спасе́нія сше́дшаго съ небе́съ и воплоти́вшагося отъ Ду́ха Свя́та и Марíи Дѣ́вы, и вочеловѣ́чшася. Распя́таго же за ны́ при Понтíйстѣмъ Пила́тѣ, и страда́вша, и погребе́на. И воскре́сшаго въ тре́тій де́нь по Писа́ніемъ. И возше́дшаго на небеса́, и сѣдя́ща одесну́ю Отца́. И па́ки гряду́щаго со сла́вою суди́ти живы́мъ и ме́ртвымъ, Его́же Ца́рствію не бу́детъ конца́. И въ Ду́ха Свята́го, Го́спода, Животворя́щаго, И́же отъ Отца́ исходя́щаго, Иже со Отце́мъ и Сы́номъ спокланя́ема и ссла́вима, глаго́лавшаго проро́ки. Во еди́ну Святу́ю, Собо́рную и Апо́стольскую Це́рковь. Исповѣ́дую еди́но креще́ніе во оставле́ніе грѣхо́въ. Ча́ю воскресе́нія ме́ртвыхъ, и жи́зни бу́дущаго вѣ́ка, ами́нь.

Стихи́ры, гла́съ 6. Подо́бенъ: Все отло́жше.

Совѣ́тъ превѣ́чный открыва́я Тебѣ́, Отрокови́це, Гавріи́лъ предста́, Тебе́ лобза́я и вѣща́я: ра́дуйся, земле́ ненасѣ́янная; ра́дуйся, купино́ неопали́мая; ра́дуйся, глубино́ неудобозри́мая; ра́дуйся, мо́сте, къ небесе́мъ преводя́й, и лѣ́ствице высо́кая, ю́же Іа́ковъ ви́дѣ; ра́дуйся, боже́ственная ру́чко ма́нны; ра́дуйся, разрѣше́ніе кля́твы; ра́дуйся, Ада́мово воззва́ніе: съ Тобо́ю Госпо́дь.

Явля́ешимися я́ко человѣ́къ, — глаго́летъ нетлѣ́нная Отрокови́ца ко архистрати́гу, — и ка́ко вѣща́еши глаго́лы па́че человѣ́ка? Со Мно́ю бо, ре́клъ еси́, Бо́гу бы́ти, и всели́тися во утро́бу Мою́. И ка́ко бу́ду, глаго́ли Ми́, село́ простра́нное и мѣ́сто свяще́нія, херуви́мы превосходя́щаго? Да не прелсти́ши мене́ ле́стію, не позна́хъ бо сла́сти, бра́ку е́смь неприча́стна, ка́ко у́бо Отроча́ рожду́?

Бо́гъ, идѣ́же хо́щетъ, побѣжда́ется естества́ чи́нъ, — глаго́летъ безпло́тный, — и я́же па́че человѣ́ка содѣва́ются, мои́мъ вѣ́руй и́стиннымъ глаго́ломъ, Всесвята́я Пренепоро́чная. — Она́ же возопи́: бу́ди Мнѣ́ ны́нѣ по глаго́лу твоему́, и рожду́ Безпло́тнаго, пло́ть отъ Мене́ заи́мствовавшаго, я́ко да возведе́тъ человѣ́ка, я́ко еди́нъ Си́ленъ, въ пе́рвое достоя́ніе, съ растворе́ніемъ.

Сла́ва, и ны́нѣ, гла́съ 2:

Еже отъ вѣ́ка та́инство открыва́ется дне́сь, и Сы́нъ Бо́жій Сы́нь человѣ́чь быва́етъ: да ху́ждшее воспріе́мь, пода́стъ ми́ лу́чшее. Солга́ся дре́вле Ада́мъ, и Бо́гъ возжелѣ́въ бы́ти, не бы́сть: Человѣ́къ быва́етъ Бо́гъ, да бога Ада́ма содѣ́лаетъ. Да весели́тся тва́рь, да ликовству́етъ естество́, я́ко арха́нгелъ Дѣ́вѣ со стра́хомъ предстои́тъ, и е́же, ра́дуйся, прино́ситъ, печа́ли сопроти́вное. За милосе́рдіе ми́лости вочеловѣ́чивыйся, Бо́же на́шъ, сла́ва Тебѣ́.

На стихо́внѣ стихи́ры, гла́съ 1. Подо́бенъ: Небе́сныхъ чино́въ.

Съ небе́сныхъ круго́въ слетѣ́въ Гавріи́лъ, въ Назаре́тъ пріи́де къ Дѣ́вѣ Марíи, вопія́ Ей: ра́дуйся! Зачне́ши Сы́на, Ада́ма дре́внѣйшаго, Творца́ вѣко́въ и Изба́вителя, вопію́щихъ Тебѣ́, ра́дуйся, Чи́стая.

Сти́хъ: Слы́ши Дщи́, и ви́ждь, и приклони́ у́хо Твое́.

Гавріи́лъ Дѣ́вѣ благовѣ́стіе съ небесе́ прине́съ, вопія́ше: ра́дуйся! Заче́нши во чре́вѣ Твое́мъ, Тобо́ю вмѣсти́маго, невмѣсти́маго же всѣ́ми, и ражда́ющая яви́шися, отъ Отца́ пре́жде денни́цы Возсія́вшаго.

Сти́хъ: Лицу́ Твоему́ помо́лятся бога́тіи лю́дстіи.

Соприсносу́щное Сло́во пребезнача́льного Отца́, не разлучи́вся го́рнихъ, ны́нѣ предста́ до́льнимъ, ра́ди кра́йняго благоутро́бія, ми́лость пріе́мь, е́же на ны́ поползнове́нія, и Ада́мову нищету́ вопріе́мь, вообрази́ся въ чужде́е.

Сти́хъ: Вся земля́ да покло́нится Тебѣ́, и пое́тъ Тебѣ́.

Отъ Отца́ присносу́щно, и отъ Ма́тере вре́менно, яви́выйся мíрови, пресу́щественное Сло́во, о́бразъ раба́ пріе́млетъ, и быва́етъ пло́ть, не отсту́пль божества́, и Ада́ма назида́етъ, во чре́вѣ безсѣ́менно заче́ншія Его́.

Сла́ва, и ны́нѣ, гла́съ 2:

Благовѣству́етъ Гавріи́лъ Благода́тнѣй дне́сь: ра́дуйся, Неневѣ́стная Ма́ти и Неискусобра́чная! Не удивля́йся стра́нному моему́ зра́ку, ни ужаса́йся, арха́нгелъ бо е́смь. Змíй прелсти́ Еву иногда́, ны́нѣ же благовѣству́ю Тебѣ́ ра́дость, и пребу́деши нетлѣ́нна, и роди́ши Го́спода, Пречи́стая.

Го́споди, поми́луй. [12.] Сла́ва, и ны́нѣ.

Пріиди́те, поклони́мся. [Трижды.]
Псало́мъ 142: Го́споди, услы́ши моли́тву мою́...

Посе́мъ тропа́рь, гла́съ 8:

Повелѣ́нное та́йно, пріе́мь въ ра́зумѣ, въ кро́вѣ Іо́сифовѣ тща́ніемъ предста́ безпло́тный, глаго́ля Неискусобра́чнѣй: Приклони́вый схожде́ніемъ небеса́, вмѣща́ется неизмѣ́нно ве́сь въ Тя́. Его́же и ви́дя въ ложесна́хъ Твои́хъ пріе́мша ра́бій зра́къ, ужаса́юся зва́ти Тебѣ́: ра́дуйся Невѣ́сто Неневѣ́стная. [Три́жды.]

Го́споди, поми́луй. [Три́жды.] Сла́ва, и ны́нѣ.
Псало́мъ 50-й: Поми́луй мя́, Бо́же...

Кано́нъ благода́рный Пресвятѣ́й Богоро́дицѣ, его́же краегране́сіе сицево́: Ра́дости прія́телище, Тебѣ́ подоба́етъ ра́доватися еди́нѣй. Творе́ніе Іо́сифово. Гла́съ 4:

Пѣ́снь 1.

Ирмо́съ: Отве́рзу уста́ моя́ и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Христо́ву кни́гу одушевле́нную, запечатлѣ́нную Тя́ Ду́хомъ, вели́кій арха́нгелъ, Чи́стая, зря́, возглаша́ше Ти́: ра́дуйся, ра́дости прія́телище, Еюже прама́терняя кля́тва разрѣши́тся.

Ада́мово исправле́ніе, ра́дуйся, Дѣ́во Богоневѣ́сто, а́дово умерщвле́ніе; ра́дуйся, Всенепоро́чная, пала́то всѣ́хъ Царя́; ра́дуйся, престо́ле о́гненный Вседержи́теля.

Сла́ва: Цвѣ́те неувяда́емый, ра́дуйся, еди́на прозя́бшая я́блоко благово́нное; ра́дуйся, ро́ждшая благоуха́ніе еди́наго Царя́; ра́дуйся, неискуобра́чная, мíрови спасе́ніе.

И ны́нѣ: Чистоты́ сокро́вище, ра́дуйся, Еюже отъ паде́нія на́шего воста́хомъ; ра́дуйся, сладкоуха́нный кри́не Влады́чице, вѣ́рныхъ благоуха́яй, кади́ло благово́нное, и мѵ́ро многоцѣ́нное.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный исто́чниче, ли́къ себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Кла́съ прозя́бшая Боже́ственный, я́ко ни́ва неора́нная я́вѣ, ра́дуйся, одушевле́нная трапе́зо, Хлѣ́бъ Живо́тный вмѣ́щшая; ра́дуйся, живо́тныя воды́ исто́чниче неистоща́емый, Влады́чице.

Юнице Юнца́ ро́ждшая непоро́чнаго, ра́дуйся, вѣ́рнымъ; ра́дуйся, Агнице, ро́ждшая Бо́жіяго Агнца, взе́млющаго мíра всего́ прегрѣше́нія; ра́дуйся, те́плое очисти́лище.

Сла́ва: Утро свѣтлѣ́йшее, ра́дуйся еди́на, Со́лнца нося́щая Христа́; Свѣ́та жили́ще, ра́дуйся, тму́ разруши́вшая, и мра́чныя бѣ́сы отню́дъ отгна́вшая.

И ны́нѣ: Ра́дуйся, две́ре еди́на, Еюже Сло́во про́йде еди́но, вереи́ и врата́ а́дова, Влады́чице, Рождество́мъ Твои́мъ сокруши́вшая; ра́дуйся, Боже́ственный вхо́де спаса́емыхъ, Богоневѣ́сто.

[Сѣда́ленъ, гла́съ 1. Подо́бенъ: Гро́б Тво́й.

Вели́кій во́инъ невеще́ственныхъ а́нгеловъ, во гра́дъ Назаре́тъ, предста́въ, Царя́ возвѣща́етъ Твоего́, Чи́стая, и вѣко́въ Го́спода: ра́дуйся, глаго́ля Тебѣ́, благослове́нная Марíе, непостижи́мая и несказа́нная глубино́, человѣ́ковъ воззва́ніе.

Сла́ва, и ны́нѣ: то́йже.]

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́, во о́блацѣ ле́гцѣ пріи́де Іису́съ Пребоже́ственный нетлѣ́нною дла́нію и спасе́ зову́щія: сла́ва, Христе́, си́лѣ Твое́й.

Во гла́сѣхъ пѣ́ній, Дѣ́во, Тебѣ́ вопіе́мъ, Всепѣ́тая: ра́дуйся, ту́чная горо́ и усыре́нная Ду́хомъ; ра́дуйся, свѣ́щниче, и ста́мно, ма́нну нося́щая, услажда́ющая всѣ́хъ благочести́выхъ чу́вства.

Очисти́лище мíру, ра́дуйся, Пречи́стая Влады́чице; ра́дуйся лѣ́ствице, отъ земли́ всѣ́хъ возвы́сившая благода́тію; ра́дуйся мо́сте, вои́стинну преводя́й всѣ́хъ отъ сме́рти къ животу́ пою́щихъ Тя́.

Небе́съ превы́шшая, ра́дуйся, земли́ основа́ніе во Твои́хъ ложесна́хъ, Пречи́стая, нетру́дно носи́вшая; ра́дуйся червлени́це, багряни́цу Боже́ственную омочи́вшая, отъ крове́й Твои́хъ, Царе́ви си́ламъ.

Сла́ва: Законода́вца ро́ждшая и́стиннаго, ра́дуйся, Влады́чице, беззако́нія всѣ́хъ ту́не очища́ющаго; недовѣ́домая глубино́, высото́ неизрече́нная, браконеиску́сная, Еюже мы́ обожи́хомся.

И ны́нѣ: Тя́, испле́тшую мíрови нерукоплете́нный вѣне́цъ, пѣсносло́вимъ, ра́дуйся, Тебѣ́ Дѣ́во зову́ще, храни́лище всѣ́хъ и огражде́ніе, и утвержде́ніе, и свяще́нное прибѣ́жище.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й, Ты́ бо, Неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га и родила́ еси́ Безлѣ́тнаго Сы́на, всѣ́мъ воспѣва́ющимъ Тя́ ми́ръ подава́ющая.

Пу́ть ро́ждшая жи́зни, ра́дуйся, Пренепоро́чная, отъ пото́па грѣхо́внаго мíръ спа́сшая; ра́дуйся, Богоневѣ́сто, слы́шаніе и глаго́ланіе стра́шное; ра́дуйся, пребыва́ніе Влады́ки тва́ри.

Крѣ́пость и утвержде́ніе человѣ́ковъ, ра́дуйся, Пречи́стая, мѣ́сто освяще́нія сла́вы, умерщвле́ніе а́дово, черто́же всесвѣ́тлый; ра́дуйся, а́нгеловъ ра́досте, ра́дуйся, по́моще вѣ́рно моля́щихся Тебѣ́.

Огнеобра́зная колесни́це Сло́ва, ра́дуйся Влады́чице, одушевле́нный раю́, дре́во посредѣ́ иму́щи жи́зни Го́спода, Его́же сла́дость оживотворя́етъ вѣ́рою причаща́ющихся, и тли́ подклони́вшихся.

Сла́ва: Укрѣпля́еми си́лою Твое́ю, вѣ́рно вопіе́мъ Ти́: ра́дуйся, гра́де всѣ́хъ Царя́, пресла́вная и достослы́шанная, о Не́йже глаго́лана бы́ша я́вѣ, горо́ несѣко́мая; ра́дуйся, глубино́ неизмѣ́римая.

И ны́нѣ: Простра́нное селе́ніе Сло́ва, ра́дуйся, Пречи́стая, сосу́де, Боже́ственный би́серъ произве́дшая; ра́дуйся, всечу́дное всѣ́хъ къ Бо́гу примире́ніе, блажа́щихъ Тя́, Богоро́дице, всегда́.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те рука́ми воспле́щимъ, отъ Нея́ ро́ждшагося Бо́га сла́вимъ.

Черто́же Сло́ва нескве́рный, вина́ всѣ́хъ обоже́нія, ра́дуйся, Пречи́стая, проро́ковъ оглаше́ніе; ра́дуйся, апо́столовъ удобре́ніе.

Отъ Тебе́ роса́ ука́ну, пла́мень многобо́жія угаси́вшая, тѣ́мъ вопіе́мъ Ти́: ра́дуйся, руно́ одушевле́нное, е́же Гедео́нъ, Дѣ́во, предви́дѣ.

Сла́ва: Се́ Тебѣ́, Дѣ́во, ра́дуйся, зове́мъ; приста́нище на́мъ бу́ди вла́ющимся, и оти́шіе въ пучи́нѣ скорбе́й, и собла́зновъ всѣ́хъ бори́теля.

И ны́нѣ: Ра́дости вина́, облагодати́ на́шъ по́мыслъ, е́же зва́ти Тебѣ́: ра́дуйся, неопали́мая купино́, о́блаче всесвѣ́тлый, вѣ́рныя непреста́нно осѣня́ющій.

Моли́тва ко Пресвятѣ́й Богоро́дицѣ.

О, Пресвята́я Влады́чице, Пречи́стая Дѣ́во Богоро́дице, Го́спода Бо́га моего́ Іису́са Христа́ Ма́ти! Припа́даю и молю́тися, я́ко Ма́тери Царе́вой, предначина́я къ Тебѣ́ недосто́йное мое́ сіе́ моле́ніе, е́же пріе́мши, о Ма́ти Царя́ небесе́ и земли́, принеси́ къ Царю́ ца́рствующему, всѣ́хъ Го́споду, Сы́ну Твоему́ и Бо́гу, и проще́ніе всѣ́мъ согрѣше́ніемъ мои́мъ испроси́, житію́ моему́ пода́ждь исправле́ніе и на кончи́нѣ отъ возду́шныхъ враго́въ немяте́жное преше́ствіе. Ца́рствія боже́ственный вхо́дъ отве́рсти исхода́тайствуй ми, и та́мо ра́йскія пи́щи наслажде́нія, го́рняго о́наго гра́да, вы́шняго прекра́снаго Іерусали́ма, весе́лія и неизрече́нныхъ того́ красо́тъ, свѣ́тлости же трисія́ннаго Тро́ичнаго свѣ́та, и сла́дкаго гла́са а́нгельскихъ пѣ́ній наслажда́тися. Ея́же сла́вы и ра́дости наслѣ́дника мя́ и святы́мъ всѣ́мъ соприча́стника сотвори́, вся́ бо мо́жеши, я́ко Ма́ти Царя́ Всемогу́щаго. И ны́нѣ у́бо, изря́днѣе же въ ча́съ се́й, услы́ши мя́, Всеми́лостивая Влады́чице, предстоя́ща Ти́, вонми́, Госпоже́ Цари́це, моле́бное пѣ́ніе принося́щу Ти́, си́це:

Та́же, кондаки́ и и́косы:

Конда́къ 1.

Взбра́нной Воево́дѣ побѣди́тельная, я́ко изба́вльшеся отъ злы́хъ, благода́рственная воспису́емъ Ти́ раби́ Твои́, Богоро́дице: но я́ко иму́щая держа́ву непобѣди́мую, отъ вся́кихъ на́съ бѣ́дъ свободи́, да зове́мъ Ти́: Ра́дуйся, Невѣ́сто Неневѣ́стная.

Икосъ 1.

Ангелъ предста́тель съ небесе́ по́сланъ бы́сть рещи́ Богоро́дицѣ: радуйся! И, со безпло́тнымъ гла́сомъ, воплоща́ема Тя́ зря́, Го́споди, ужаса́шеся и стоя́ше, зовы́й къ Не́й такова́я:

Ра́дуйся, Еюже ра́дость возсія́етъ; ра́дуйся, Еюже кля́тва исче́знетъ.

Ра́дуйся, па́дшаго Ада́ма воззва́ніе; ра́дуйся, сле́зъ Евиныхъ избавле́ніе.

Ра́дуйся, высото́, неудобовосходи́мая человѣ́ческими по́мыслы; ра́дуйся глубино́, неудобозри́мая и а́нгельскима очи́ма.

Ра́дуйся, я́ко еси́ Царе́во сѣда́лище; ра́дуйся, я́ко но́сиши Нося́щаго вся́.

Ра́дуйся, звѣздо́, явля́ющая Со́лнце; ра́дуйся, утро́бо Боже́ственнаго воплоще́нія.

Ра́дуйся, Еюже обновля́ется тва́рь; ра́дуйся, Еюже покланя́емся Творцу́.

Ра́дуйся, Невѣ́сто Неневѣ́стная.

Конда́къ 2.

Ви́дящи Свята́я Себе́ въ чистотѣ́, глаго́летъ Гавріи́лу де́рзостно: пресла́вное твоего́ гла́са, неудобопрія́тельно души́ Мое́й явля́ется; безсѣ́меннаго бо зача́тія рождество́ ка́ко глаго́леши, зовы́й: Аллилу́ія.

Икосъ 2.

Ра́зумъ недоразумѣва́емый разумѣ́ти Дѣ́ва и́щущи, возопи́ къ служа́щему: изъ боку́ чи́сту, Сы́ну ка́ко е́сть роди́тися мо́щно, рцы́ Ми? — Къ Не́йже о́нъ рече́ со стра́хомъ, оба́че зовы́й си́це:

Ра́дуйся, совѣ́та неизрѣче́ннаго та́йно; ра́дуйся, молча́нія прося́щихъ вѣ́ро.

Ра́дуйся, чуде́съ Христо́выхъ нача́ло; ра́дуйся, велѣ́ній Его́ глави́зно.

Ра́дуйся лѣ́ствице небе́сная, е́юже сни́де Бо́гъ; ра́дуйся, мо́сте, преводя́й су́щихъ отъ земли́ на не́бо.

Ра́дуйся, а́нгеловъ многослову́щее чу́до; ра́дуйся, бѣсо́въ многоплаче́вный стру́пе.

Ра́дуйся, Свѣ́тъ неизрѣче́нно роди́вшая; ра́дуйся, е́же ка́ко, ни еди́наго же научи́вшая.

Ра́дуйся, прему́дрыхъ превосходя́щая ра́зумъ; ра́дуйся, вѣ́рныхъ озаря́ющая смы́слы.

Ра́дуйся, Невѣ́сто Неневѣ́стная.

Конда́къ 3.

Си́ла Вы́шняго осѣни́ тогда́ къ зача́тію Браконеиску́сную, и благопло́дная Тоя́ ложесна́, я́ко село́ показа́ сла́дкое, всѣ́мъ хотя́щымъ жа́ти спасе́ніе, внегда́ пѣ́ти си́це: Аллилу́ія.

Икосъ 3.

Иму́щи богопрія́тную Дѣ́ва утро́бу, востече́ ко Елисаве́ти; младе́нецъ же о́ноя а́біе позна́въ сея́ цѣлова́ніе, ра́довашеся, и игра́ньми я́ко пѣ́сньми вопія́ше къ Богоро́дицѣ:

Ра́дуйся, о́трасли неувяда́емыя розго́; ра́дуйся, плода́ безсме́ртнаго стяжа́ніе.

Ра́дуйся, дѣ́лателя дѣ́лающая Человѣколю́бца; ра́дуйся, Сади́теля жи́зни на́шея ро́ждшая.

Ра́дуйся, ни́во, растя́щая гобзова́ніе щедро́тъ; ра́дуйся, трапе́зо, нося́щая оби́ліе очище́нія.

Ра́дуйся, я́ко ра́й пи́щный процвѣта́еши; ра́дуйся, я́ко приста́нище душа́мъ гото́виши.

Ра́дуйся, прія́тное моли́твы кади́ло; ра́дуйся, всего́ мíра очище́ніе.

Ра́дуйся, Бо́жіе ко сме́ртнымъ благоволе́ніе; ра́дуйся, сме́ртныхъ къ Бо́гу дерзнове́ніе.

Ра́дуйся, Невѣ́сто Неневѣ́стная.

Конда́къ 4.

Бу́рю вну́трь имѣ́я помышле́ній сумни́тельныхъ, цѣлому́дренный Іо́сифъ смяте́ся, къ Тебѣ́ зря́ небра́чнѣй, и бракоокра́дованную помышля́я, Непоро́чная: увѣ́дѣвъ же Твое́ зача́тіе отъ Ду́ха Свя́та, рече́: Аллилу́ія.

Икосъ 4.

Слы́шаша па́стыріе а́нгеловъ пою́щихъ плотско́е Христо́во прише́ствіе, и те́кше я́ко къ Па́стырю, ви́дятъ сего́, я́ко Агнца непоро́чна, во чре́вѣ Марíинѣ упа́сшася, Юже пою́ще, рѣ́ша:

Ра́дуйся, Агнца и Па́стыря Ма́ти; ра́дуйся, дво́ре слове́сныхъ ове́цъ.

Ра́дуйся, неви́димыхъ враго́въ муче́ніе; ра́дуйся, ра́йскихъ две́рей отверзе́ніе.

Ра́дуйся, я́ко небе́сная сра́дуются земны́мъ; ра́дуйся, я́ко земна́я сликовству́ютъ небе́снымъ.

Ра́дуйся, апо́столовъ немо́лчная уста́; ра́дуйся, страстоте́рпцевъ непобѣди́мая де́рзосте.

Ра́дуйся, тве́рдое вѣ́ры утвержде́ніе; ра́дуйся, свѣ́тлое благода́ти позна́ніе.

Ра́дуйся, Еюже обнажи́ся а́дъ; ра́дуйся, Еюже облеко́хомся сла́вою.

Ра́дуйся, Невѣ́сто Неневѣ́стная.

Конда́къ 5.

Боготе́чную звѣзду́ узрѣ́вше волсви́, тоя́ послѣ́доваша зари́: и я́ко свѣти́льникъ держа́ще ю́, то́ю испыта́ху крѣ́пкаго Царя́: и дости́гше непостижи́маго, возра́довашася, Ему́ вопію́ще: Аллилу́ія.

Икосъ 5.

Ви́дѣша о́троцы халде́йстіи на руку́ Дѣви́чу, созда́вшаго рука́ма человѣ́ки, и Влады́ку разумѣва́юще Его́, а́ще и ра́бій прія́тъ зра́къ, потща́шася дарми́ послужи́ти Ему́, и возопи́ти Благослове́ннѣй:

Ра́дуйся, звѣзды́ незаходи́мыя Ма́ти; ра́дуйся, заре́ та́инственнаго дне́.

Ра́дуйся, пре́лести пе́щь угаси́вшая; ра́дуйся, Тро́ицы таи́нники просвѣща́ющая.

Ра́дуйся, мучи́теля безчеловѣ́чнаго измета́ющая отъ нача́льства; ра́дуйся, Го́спода Человѣколю́бца показа́вшая Христа́.

Ра́дуйся, ва́рварскаго избавля́ющая служе́нія; ра́дуйся, тимѣ́нія изъима́ющая дѣ́лъ.

Ра́дуйся, огня́ поклоне́ніе угаси́вшая; ра́дуйся, пла́мене страсте́й измѣня́ющая.

Ра́дуйся, вѣ́рныхъ наста́внице цѣлому́дрія; ра́дуйся, всѣ́хъ родо́въ весе́ліе.

Ра́дуйся, Невѣ́сто Неневѣ́стная.

Конда́къ 6.

Проповѣ́дницы богоно́сніи бы́вше волсви́, возврати́шася въ Вавило́нъ, сконча́вше Твое́ проро́чество: и проповѣ́давше Тя́ Христа́ всѣ́мъ, оста́виша Ирода я́ко лжи́ва, невѣ́дуща пѣ́ти: Аллилу́ія.

Икосъ 6.

Возсія́вый во Еги́птѣ просвѣще́ніе и́стины, отгна́лъ еси́ лжи́ тму́: и́доли бо его́, Спа́се, не терпя́ще Твоея́ крѣ́пости, падо́ша; си́хъ же изба́вльшіися вопія́ху къ Богоро́дицѣ:

Ра́дуйся, исправле́ніе человѣ́ковъ; ра́дуйся, низпаде́ніе бѣсо́въ.

Ра́дуйся, пре́лести держа́ву попра́вшая; ра́дуйся, и́дольскую ле́сть обличи́вшая.

Ра́дуйся, мо́ре, потопи́вшее фарао́на мы́сленнаго; ра́дуйся, ка́меню, напои́вшій жа́ждущія жи́зни.

Ра́дуйся, о́гненный сто́лпе, наставля́яй су́щія во тмѣ́; ра́дуйся, покро́ве мíру, ши́ршій о́блака.

Ра́дуйся, пи́ще, ма́нны пріе́мнице; ра́дуйся, сла́дости святы́я служи́тельнице.

Ра́дуйся, земле́ обѣтова́нія; ра́дуйся, изъ нея́же тече́тъ ме́дъ и млеко́.

Ра́дуйся, Невѣ́сто Неневѣ́стная.

Конда́къ 7.

Хотя́щу Симео́ну отъ ны́нѣшняго вѣ́ка преста́витися преле́стнаго, вда́лся еси́ я́ко младе́нецъ тому́, но позна́лся еси́ ему́ и Бо́гъ соверше́нный: тѣ́мже удиви́ся Твое́й неизрѣче́ннѣй прему́дрости, зовы́й: Аллилу́ія.

Икосъ 7.

Но́вую показа́ тва́рь, я́влься Зижди́тель, на́мъ отъ Него́ бы́вшымъ, изъ безсѣ́менныя прозя́бъ утро́бы, и сохрани́въ ю́, я́коже бѣ́, нетлѣ́нну, да чу́до ви́дяще, воспое́мъ ю́, вопію́ще:

Ра́дуйся, цвѣ́те нетлѣ́нія; ра́дуйся, вѣ́нче воздержа́нія.

Ра́дуйся, воскресе́нія о́бразъ облиста́ющая; ра́дуйся, а́нгельское житіе́ явля́ющая.

Ра́дуйся, дре́во свѣтлоплодови́тое, отъ него́же пита́ются вѣ́рніи; ра́дуйся, дре́во благосѣнноли́ственное, и́мже покрыва́ются мно́зи.

Ра́дуйся, во чре́вѣ нося́щая Изба́вителя плѣне́ннымъ; ра́дуйся, ро́ждшая Наста́вника заблу́ждшымъ.

Ра́дуйся, Судіи́ Пра́веднаго умоле́ніе; ра́дуйся, мно́гихъ согрѣше́ній проще́ніе.

Ра́дуйся, оде́ждо наги́хъ дерзнове́нія; ра́дуйся, любы́ вся́ко жела́ніе побѣжда́ющая.

Ра́дуйся, Невѣ́сто Неневѣ́стная.

Конда́къ 8.

Стра́нное рождество́ ви́дѣвше, устрани́мся мíра, у́мъ на небеса́ прело́жше: сего́ бо ра́ди высо́кій Бо́гъ на земли́ яви́ся смире́нный человѣ́къ, хотя́й привлещи́ къ высотѣ́, Тому́ вопію́щія: Аллилу́ія.

Икосъ 8.

Ве́сь бѣ́ въ ни́жнихъ, и вы́шнихъ ника́коже отступи́ неопи́санное Сло́во: снисхожде́ніе бо Боже́ственное, не прехожде́ніе же мѣ́стное бы́сть, и рождество́ отъ Дѣ́вы богопрія́тныя, слы́шащія сія́:

Ра́дуйся, Бо́га невмѣсти́маго вмѣсти́лище; ра́дуйся, честна́го та́инства две́ри.

Ра́дуйся, невѣ́рныхъ сумни́тельное слы́шаніе; ра́дуйся, вѣ́рныхъ извѣ́стная похвало́.

Ра́дуйся, колесни́це пресвята́я Су́щаго на херуви́мѣхъ; ра́дуйся, селе́ніе пресла́вное Су́щаго на серафи́мѣхъ.

Ра́дуйся, проти́вная въ то́жде собра́вшая; ра́дуйся, дѣ́вство и рождество́ сочета́вшая.

Ра́дуйся, Еюже разрѣши́ся преступле́ніе; ра́дуйся, Еюже отве́рзеся ра́й.

Ра́дуйся, ключу́ Ца́рствія Христо́ва; ра́дуйся, наде́ждо бла́гъ вѣ́чныхъ.

Ра́дуйся, Невѣ́сто Неневѣ́стная.

Конда́къ 9.

Вся́кое естество́ а́нгельское удиви́ся вели́кому Твоего́ вочеловѣ́ченія дѣ́лу: непристу́пнаго бо я́ко Бо́га, зря́ше всѣ́мъ присту́пнаго Человѣ́ка, на́мъ у́бо спребыва́юща, слы́шаща же отъ всѣ́хъ: Аллилу́ія.

Икосъ 9.

Вітíя многовѣща́нныя, я́ко ры́бы безгла́сныя ви́димъ о Тебѣ́, Богоро́дице: недоумѣва́ютъ бо глаго́лати, е́же ка́ко и Дѣ́ва пребыва́еши, и роди́ти возмогла́ еси́? Мы́ же та́инству дивя́щеся, вѣ́рно вопіе́мъ:

Ра́дуйся, прему́дрости Бо́жія прія́телище; ра́дуйся, промышле́нія Его́ сокро́вище.

Ра́дуйся, любому́дрыя нему́дрыя явля́ющая; ра́дуйся, хитрослове́сныя безслове́сныя облича́ющая.

Ра́дуйся, я́ко обуя́ша лю́тіи взыска́теле; ра́дуйся, я́ко увядо́ша баснотво́рцы.

Ра́дуйся, аѳине́йская плете́нія растерза́ющая; ра́дуйся, ры́барскія мре́жи исполня́ющая.

Ра́дуйся, изъ глубины́ невѣ́дѣнія извлача́ющая; ра́дуйся, мно́ги въ ра́зумѣ просвѣща́ющая.

Ра́дуйся, кораблю́ хотя́щихъ спасти́ся; ра́дуйся, приста́нище жите́йскихъ пла́ваній.

Ра́дуйся, Невѣ́сто Неневѣ́стная.

Конда́къ 10.

Спасти́ хотя́ мíръ, и́же всѣ́хъ Украси́тель, къ сему́ самообѣтова́нъ пріи́де, и Па́стырь сы́й я́ко Бо́гъ, на́съ ра́ди яви́ся по на́мъ человѣ́къ: подо́бнымъ бо подо́бное призва́въ, я́ко Бо́гъ слы́шитъ: Аллилу́ія.

Икосъ 10.

Стѣна́ еси́ дѣ́вамъ, Богоро́дице Дѣ́во, и всѣ́мъ къ Тебѣ́ прибѣга́ющымъ, и́бо небесе́ и земли́ Творе́цъ устро́и Тя́, Пречи́стая, все́лься во утро́бѣ Твое́й, и вся́ приглаша́ти Тебѣ́ научи́въ:

Ра́дуйся, сто́лпе дѣ́вства; ра́дуйся, две́рь спасе́нія.

Ра́дуйся, нача́льнице мы́сленнаго назда́нія; ра́дуйся, пода́тельнице Боже́ственныя бла́гости.

Ра́дуйся, Ты́ бо обнови́ла еси́ зача́тыя сту́дно; ра́дуйся, Ты́ бо наказа́ла еси́ окра́денныя умо́мъ.

Ра́дуйся, тли́теля смы́словъ упражня́ющая; ра́дуйся, Сѣ́ятеля чистоты́ ро́ждшая.

Ра́дуйся, черто́же безсѣ́меннаго уневѣ́щенія; ра́дуйся, вѣ́рныхъ Го́сподеви сочета́вшая.

Ра́дуйся, до́брая младопита́тельнице дѣ́вамъ; ра́дуйся, невѣстокраси́тельнице ду́шъ святы́хъ.

Ра́дуйся, Невѣ́сто Неневѣ́стная.

Конда́къ 11.

Пѣ́ніе вся́кое побѣжда́ется, спростре́тися тща́щееся ко мно́жеству мно́гихъ щедро́тъ Твои́хъ: равночи́сленныя бо песка́ пѣ́сни а́ще прино́симъ Ти́, Царю́ Святы́й, ничто́же соверша́емъ досто́йно, я́же да́лъ еси́ на́мъ, Тебѣ́ вопію́щимъ: Аллилу́ія.

Икосъ 11.

Свѣтопріе́мную свѣщу́, су́щимъ во тмѣ́ я́вльшуюся, зри́мъ Святу́ю Дѣ́ву: невеще́ственный бо вжига́ющи о́гнь, наставля́етъ къ ра́зуму Боже́ственному вся́, заре́ю у́мъ просвѣща́ющая, зва́ніемъ же почита́емая, си́ми:

Ра́дуйся, луче́ у́мнаго со́лнца; ра́дуйся, свѣти́ло Незаходи́маго Свѣ́та.

Ра́дуйся, мо́лніе, ду́ши просвѣща́ющая; ра́дуйся, я́ко гро́мъ, враги́ устраша́ющая.

Ра́дуйся, я́ко многосвѣ́тлое возсіява́еши просвѣще́ніе; ра́дуйся, я́ко многотеку́щую источа́еши рѣку́.

Ра́дуйся, купѣ́ли живопису́ющая о́бразъ; ра́дуйся, грѣхо́вную отъе́млющая скве́рну.

Ра́дуйся, ба́не, омыва́ющая со́вѣсть; ра́дуйся, ча́ше, че́рплющая ра́дость.

Ра́дуйся, обоня́ніе Христо́ва благоуха́нія; ра́дуйся, животе́ та́йнаго весе́лія.

Ра́дуйся, Невѣ́сто Неневѣ́стная.

Конда́къ 12.

Благода́ть да́ти восхотѣ́въ, долго́въ дре́внихъ, всѣ́хъ долго́въ Рѣши́тель человѣ́комъ, пріи́де Собо́ю ко отше́дшымъ Того́ благода́ти и, раздра́въ рукописа́ніе, слы́шитъ отъ всѣ́хъ си́це: Аллилу́ія.

Икосъ 12.

Пою́ще Твое́ рождество́, хва́лимъ Тя́ вси́, я́ко одушевле́нный хра́мъ, Богоро́дице: во Твое́й бо всели́вся утро́бѣ, содержа́й вся́ руко́ю Госпо́дь, освяти́, просла́ви и научи́ вопи́ти Тебѣ́ всѣ́хъ:

Ра́дуйся, селе́ніе Бо́га и Сло́ва; ра́дуйся, Свята́я святы́хъ бо́льшая.

Ра́дуйся, ковче́же позлаще́нный Ду́хомъ; ра́дуйся, сокро́вище живота́ неистощи́мое.

Ра́дуйся, честны́й вѣ́нче царе́й благочести́выхъ; ра́дуйся, честна́я похвало́ іере́евъ благоговѣ́йныхъ.

Ра́дуйся, Це́ркве непоколеби́мый сто́лпе; ра́дуйся, Ца́рствія неруши́мая стѣно́.

Ра́дуйся, Еюже воздви́жутся побѣ́ды; ра́дуйся, Еюже низпа́даютъ врази́.

Ра́дуйся, тѣ́ла моего́ врачева́ніе; ра́дуйся, души́ моея́ спасе́ніе.

Ра́дуйся, Невѣ́сто Неневѣ́стная.

Конда́къ 13.

О, всепѣ́тая Ма́ти, ро́ждшая всѣ́хъ святы́хъ Святѣ́йшее Сло́во! Ны́нѣшнее пріе́мши приноше́ніе, отъ вся́кія изба́ви напа́сти всѣ́хъ, и бу́дущія изми́ му́ки о Тебѣ́ вопію́щихъ: Алли́луія. [Три́жды.]

И па́ки чте́тся 1-й и́косъ: Ангелъ предста́тель… И конда́къ: Взбра́нной Воево́дѣ...

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Воспѣва́емъ Тя́, вопію́ще: ра́дуйся, колесни́це Со́лнца у́мнаго, лозо́ и́стинная, Гро́здъ зрѣ́лый воздѣ́лавшая, вино́ источа́ющій, ду́ши веселя́щее, вѣ́рою Тя́ сла́вящихъ.

Врача́ всѣ́хъ человѣ́ковъ ро́ждшая, ра́дуйся, Богоневѣ́сто, же́зле та́йный, Цвѣ́тъ неувяда́емый процвѣ́тшій; ра́дуйся, Влады́чице, Еюже ра́дости наполня́емся, и жи́знь наслѣ́дствуемъ.

Вітíйствующій не мо́жетъ язы́къ, Влады́чице, пѣсносло́вити Тя́, па́че бо серафи́мовъ возвы́силася еси́, ро́ждши Царя́ Христа́; Его́же моли́, вся́каго ны́нѣ вре́да изба́витися, вѣ́рно Тебѣ́ покланя́ющимся.

Сла́ва: Хва́лятъ Тя́, блажа́ще концы́, и любо́вію зову́тъ Тебѣ́: ра́дуйся, сви́тче, въ не́мже пе́рстомъ Отчимъ написа́ся Сло́во, Чи́стая. Его́же моли́, въ кни́зѣ живо́тнѣй, рабо́мъ Твои́мъ написа́тися, Богоро́дице.

И ны́нѣ: Мо́лимъ, раби́ Твои́, и приклоня́емъ колѣ́но се́рдца на́шего: приклони́ у́хо Твое́, Чи́стая, и спаси́ скорбми́ погружа́емыя при́сно, и соблюди́ отъ вся́каго вра́жія плѣне́нія Тво́й гра́дъ, Богоро́дице.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте дѣла́ и превозноси́те Его́ во вся́ вѣ́ки.

Ложесны́ Сло́во прія́ла еси́, вся́ Нося́щаго носи́ла еси́, млеко́мъ пита́ла еси́, ма́ніемъ Пита́ющаго вселе́нную всю́, Чи́стая. Ему́же пое́мъ: Го́спода по́йте дѣла́, и превозноси́те во вся́ вѣ́ки.

Моисе́й уразумѣ́ въ купинѣ́ вели́кое та́инство Рождества́ Твоего́, о́троцы же прообрази́ша сіе́ я́вственнѣе: посредѣ́ огня́ стоя́ще и не опаля́еми, нетлѣ́нная Свята́я Дѣ́во; тѣ́мъ Тя́ почита́емъ во вся́ вѣ́ки.

Пре́жде пре́лестію обнажи́вшіися въ ри́зу нетлѣ́нія облеко́хомся Рождество́мъ Твои́мъ, и сѣдя́щіи во тмѣ́ прегрѣше́ній, Свѣ́тъ ви́дѣхомъ, Свѣ́та жили́ще, Отрокови́це, тѣ́мъ Тя́ пое́мъ во вся́ вѣ́ки.

Сла́ва: Ме́ртвіи Тобо́ю оживля́ются, Жи́знь бо ѵпоста́сную родила́ еси́, нѣ́міи пре́жде, благоглаго́ливи быва́ютъ, прокаже́нніи очища́ются, неду́зи отгоня́ются, духо́въ возду́шныхъ мно́жества побѣжда́ются, Дѣ́во, человѣ́ковъ спасе́ніе.

И ны́нѣ: Мíру ро́ждшая спасе́ніе, и́мже отъ земли́ на высоту́ взя́ти бы́хомъ, ра́дуйся, Всеблагослове́нная, покро́ве и держа́во, стѣно́ и утвержде́ніе пою́щимъ, Чи́стая: Го́спода по́йте дѣла́, и превозноси́те во вся́ вѣ́ки.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Да Тебѣ́, вѣ́рніи, ра́дуйся, зове́мъ, Тобо́ю ра́дости прича́стницы бы́вше присносу́щныя; изба́ви на́съ напа́стей, ва́рварскаго плѣне́нія, и вся́кія ины́я ра́ны, за мно́жество, Отрокови́це, прегрѣше́ній, находя́щія человѣ́комъ согрѣша́ющимъ.

Яви́лася еси́ просвѣще́ніе на́ше и утвержде́ніе, тѣ́мже вопіе́мъ Ти́: ра́дуйся, звѣздо́ незаходи́мая, вводя́щая въ мíръ вели́кое Со́лнце; ра́дуйся, Еде́мъ отве́рзшая заключе́нный, Чи́стая; ра́дуйся, сосу́де, мѵ́ро неистощи́мое на Тя́ излія́нное пріе́мшій.

Ста́немъ благоговѣ́йно въ дому́ Бо́га на́шего, и возопіи́мъ: ра́дуйся, мíру Влады́чице; ра́дуйся, Марíе, Госпоже́ всѣ́хъ на́съ; ра́дуйся, еди́на непоро́чная въ жена́хъ и до́брая; ра́дуйся, сто́лпе о́гненный, вводя́щій въ вы́шнюю жи́знь человѣ́чество.

Сла́ва: Голуби́це, Ми́лостиваго ро́ждшая, ра́дуйся, Приснодѣ́во; преподо́бныхъ всѣ́хъ, ра́дуйся, похвало́, страда́льцевъ вѣнча́ніе; ра́дуйся, всѣ́хъ пра́ведныхъ боже́ственное удобре́ніе, и на́мъ, вѣ́рнымъ, спасе́ніе.

И ны́нѣ: Пощади́, Бо́же, наслѣ́діе Твое́, грѣхи́ на́ша вся́ презрѣ́въ ны́нѣ, на сіе́ имѣ́я моля́щую Тя́, на земли́ безсѣ́менно Тебе́ Ро́ждшую, вели́кія ра́ди ми́лости восхотѣ́вшаго вообрази́тися, Христе́, въ человѣ́чество.

Свѣти́ленъ. [Подобенъ: Жены, услышите.]

Еже отъ вѣ́ка дне́сь открыва́ется та́инство Бо́жіе: Бо́гъ Сло́во Сы́нъ Дѣ́вы Марíи за милосе́рдіе быва́етъ, и ра́дость Благовѣ́щенія Гавріи́лъ провѣщава́етъ; съ ни́мже вопіе́мъ Ей: ра́дуйся, Ма́ти Госпо́дня. [Три́жды.]

На хвали́техъ стихи́ры, гла́съ 4. Подо́бенъ: Яко до́бля.

Сокрове́нное та́инство, и а́нгеломъ невѣ́домое, Гавріи́лъ увѣря́етъ арха́нгелъ, и къ Тебѣ́ ны́нѣ пріи́де, еди́нѣй нетлѣ́ннѣй и до́брѣй голуби́цѣ, ро́да на́шего воззва́нію, и вопіе́тъ Тебѣ́, Пресвята́я, е́же ра́дуйся; угото́вися сло́вомъ, Бо́га Сло́ва Твои́ми ложесна́ми прія́ти.

Свѣтоно́сная пала́та угото́вася Тебѣ́, Влады́ко, утро́ба чи́стая Богоотрокови́цы; гряди́ къ Се́й и сни́ди, уще́дри созда́ніе Твое́, зави́стно бра́нь пріе́мшее, и рабо́тою удержа́нное льсти́ваго, и добро́ту пе́рвую погуби́вшее, и Твоего́ спаси́тельнаго ча́ющее соше́ствія.

Гавріи́лъ арха́нгелъ къ Тебѣ́, Всенепоро́чная, явле́нно пріи́детъ и возопіе́тъ Тебѣ́: ра́дуйся, кля́твы разрѣше́ніе, па́дшихъ воста́ніе; ра́дуйся, еди́на избра́нная Бо́гу бы́вшая; ра́дуйся, колесни́це Со́лнца сла́вы; пріими́ Безпло́тнаго, во утро́бѣ Твое́й всели́тися хотя́щаго.

Сла́ва, и ны́нѣ, гла́съ 4:

Язы́ка, его́же не вѣ́дяше, услы́ша Богоро́дица, глаго́лаше бо къ Не́й арха́нгелъ Благовѣ́щенія глаго́лы; отоню́дуже вѣ́рно пріе́мше цѣлова́ніе, зача́тъ Тя́ Превѣ́чнаго Бо́га. Тѣ́мже и мы́, ра́дующеся, вопіе́мъ Ти́: изъ Нея́ воплоти́выйся непрело́жно Бо́же, ми́ръ мíрови да́руй, и душа́мъ на́шимъ ве́лію ми́лость.

Моли́тва ко Пресвятѣ́й Богоро́дицѣ.

Нескве́рная, Небла́зная, Нетлѣ́нная, Пречи́стая Богоро́дице, Пренепоро́чная Влады́чице, небе́сная Цари́це, Ма́ти Царя́ вы́шнихъ си́лъ, Творца́ небесе́ и земли́, еди́на ра́дости Хода́таице всему́ мíру, ро́ждшая Го́спода на́шего Іису́са Христа́, земны́мъ всѣ́мъ Спаси́теля! Вопію́ Ти́, припа́дая: пріими́ моле́бное сіе́ пѣ́ніе благода́рственное отъ недосто́йнаго раба́ Твоего́ и отъ скве́рныхъ усте́нъ мои́хъ, не пре́зри мене́, Всегосподова́нная Цари́це. Ибо никто́же претѣтека́яй къ Тебѣ́ посра́мленъ бы́сть, или́ кто́ призыва́яй Тя́ не услы́шанъ отъ Тебе́ изы́де; я́ко вся́ стихíи: не́бо и земля́, возду́хъ и мо́ре повину́ются Тебѣ́, и вси́ проти́вни ду́си стра́хомъ обдержи́ми трепе́щутъ, боя́щеся и́мене свята́го Твоего́, вѣ́дуще Тя́ Ма́терь Бо́жію. Кто́ па́ки наде́жду возложи́вый на Тя́ поги́бе? То́чію отмета́ющіися покланя́тися о́бразу Твоему́ напи́санному, его́же вся́ си́лы небе́сныя чту́тъ, вся́ же колѣ́на земна́я, христіа́нскій ро́дъ и вся́къ во́зрастъ вѣ́рныхъ, славосло́вяще покланя́емся, Пречи́стая, благоговѣ́йно почита́юще. Не и́мамы бо ино́го Бо́га, ра́звѣ Сы́на Твоего́, со Отце́мъ при́сно и Ду́хомъ Святы́мъ, во Еди́номъ Божествѣ́, отъ всея́ тва́ри сла́вимаго и покланя́емаго, и Тебе́ по Го́сподѣ Бо́зѣ Госпожу́ Богоро́дицу исповѣ́дуемъ, и́стиннаго Бо́га на́шего Ма́терь, и любе́зно вси́ почита́емъ, Госпоже́. Ми́лостива у́бо на́мъ Сы́на Твоего́ сотвори́, па́че же покажи́ на мнѣ́ обы́чное Твое́ милосе́рдіе, мо́жеши бо, ели́ка хо́щеши: умоли́ о мнѣ́, я́ко удали́хся отъ Него́ за безчи́сленная и скве́рная беззако́нія моя́, и толи́ко прогнѣ́вахъ благоутро́біе Его́, и огорчи́хъ человѣколю́бную Его́ бла́гость и мно́гое милосе́рдіе и ми́лость, я́ко нѣ́смь досто́инъ отъ Него́ поми́лованъ бы́ти, а́ще не Ты́ уми́лостивиши Его́ о мнѣ́, Госпоже́ Цари́це и Богома́ти, я́ко вся́ Тебѣ́ отъ Него́ возмо́жна су́ть. Сего́ ра́ди къ Тебѣ́ прибѣга́ю, те́плой Помо́щницѣ и ско́рой Засту́пницѣ, не и́мамъ бо ины́я ра́звѣ Тебе́ къ Нему́ Хода́таицы. Ей, Цари́це, моя́ Влады́чице, Пречи́стая Госпоже́ Богоро́дице, нѣ́сть ми ино́го высоча́йшаго на земли́ и на небеси́, я́коже Ты́ по Го́сподѣ Бо́зѣ мое́мъ Іису́сѣ Христѣ́, и на Тя́ всю́ мою́ наде́жду и́мамъ, Пречи́стая Дѣ́во. Тѣ́мже на Тво́й пресвяты́й о́бразъ взира́я, я́ко и́стинную Са́мую Тя́ зрю́ Богоро́дицу, вѣ́рою серде́чною и любо́вію отъ души́ припа́дая, покланя́юся Тебѣ́ съ Превѣ́чнымъ на руку́ Твое́ю держи́мымъ Младе́нцемъ, Го́сподемъ на́шимъ Іису́съ Христо́мъ, боголѣ́пно почита́я, и моле́бная пѣ́нія и моли́твы принося́ Ти, ужаса́юся, и трепе́щу за недосто́инство мое́, и вопію́ Ти: поми́луй мя́, Ма́ти Бо́жія, и покажи́ на мнѣ́ убо́зѣмъ дре́внія ми́лости Твоя́. Якоже иногда́ дре́вле всеси́льнымъ Твои́мъ воево́дствомъ спасла́ еси́ Ца́рствующій гра́дъ Тво́й отъ ски́ѳскаго воево́ды звѣрообра́знаго, лука́ваго вепря́, предста́теля бѣсо́мъ, о́наго прего́рдаго кага́на, и разсвирѣ́пѣющимъ мо́ремъ тмочи́сленная во́инства потопи́ла еси́, вопію́щая и напа́дающая на гра́дъ Тво́й; и па́ки, съ небесе́ одожде́ніемъ горя́щихъ ка́мыкъ, тмы́ корабле́й въ мо́ри врѣ́ющѣмъ развари́ла еси́; и ны́нѣ, еди́на Богома́ти, еди́на Ты́ та́яжде су́щи, яви́ на мнѣ́ человѣколю́бное Твое́ заступле́ніе, побѣди́ неви́димыя полки́ сатанины́, душе́вный мо́й гра́дъ расплѣни́вшія, и ца́рствующую ду́шу мою́ въ не́мъ стрѣло́ю беззако́нія уязви́вшія, и всего́ мя́ мечи́ любодѣ́йствія изсѣ́кшія, и грѣхо́внымъ, увы́, копіе́мъ пробо́дшія; и́бо ели́ жи́ва оста́виша, и въ ро́вѣ грѣхо́внѣмъ затвори́ша мя́ нечу́вствія, и окамене́ніе серде́чное наложи́ша ми́, я́ко едва́ ощуща́юся, не могíй отъ порабоще́нія тѣ́хъ свободи́тися. Но къ Тебѣ́, Ма́тери Го́спода моего́, рыда́ніемъ сле́зъ зову́: предста́ни ми́ въ по́мощь ско́ро, да не до конца́ поги́бну, исхи́ти мя́ изъ руки́ тѣ́хъ, и извлецы́ мя изъ грѣхо́внаго ро́ва, возста́ви па́ки душе́вный мо́й гра́дъ, и ума́ влады́ку въ не́мъ воцари́, и надъ всѣ́ми чу́вствы укрѣпи́, непристу́пна и стра́шна враго́мъ покажи́; да вси́ увѣ́дятъ, я́ко Тобо́ю содержи́мь е́смь. Спаса́ющи спаси́, Влады́чице Дѣ́во, ду́шу мою́, я́коже Тво́й гра́дъ иногда́, на Тя́ упова́ющій, спасла́ еси́, на сла́ву и заступле́ніе вѣ́рнымъ, на посрамле́ніе же нечести́вымъ, и во вѣ́ки на безконе́чное и́хъ муче́ніе, на вели́чіе же и похвалу́ отъ ро́да въ ро́ды правовѣ́рному христіа́нскому ро́ду. Тѣ́мже Твою́ по́мощь проповѣ́дую велегла́сно, и о́наго Твоего́ вели́каго заступле́нія стра́шное воево́дство воспомина́я, Тебѣ́ Взбра́нной Воево́дѣ побѣди́тельная воспису́ю ра́бъ Тво́й, Богоро́дице, и моле́бное сіе́ ака́ѳистово приношу́ благодаре́ніе: пріими́ е́, и принеси́ Твоему́ Сы́ну и Бо́гу, и о мнѣ́, Цари́це, съ небе́сными во́и и съ ли́ки святы́хъ всѣ́хъ, Ему́ предложи́. Въ де́нь же су́дный не забу́ди мене́, и недосто́йнаго моего́ моле́нія, и вѣ́ры моея́, я́же къ Тебѣ́, и все́ упова́ніе мое́ возложе́нное на Тя́ воспомяни́. Утѣ́ши оскорбле́ннаго мене́, и тѣле́сное облегчи́ озлобле́ніе, душе́вныя же болѣ́зни и стра́сти тѣле́сныя пре́жде всѣ́хъ потреби́ Твои́мъ неви́димымъ предста́тельствомъ и хода́тайствомъ. Да пу́ть маловре́меннаго сего́ житія́ до́брѣ и непреткнове́нно возмогу́ прейти́, и вѣ́чная о́ная блага́я получу́, и славосло́влю Твое́ тве́рдое заступле́ніе, я́ко багослове́на еси́, съ ро́ждшимся отъ Тебе́ Сы́номъ и Бо́гомъ, ны́нѣ и въ безконе́чныя вѣ́ки, ами́нь.

Моли́тва втора́я ко Пресвятѣ́й Богоро́дицѣ.

Пріими́, всеблагомо́щная, Пречи́стая Госпоже́ Влады́чице Богороди́тельнице, сія́ честны́я да́ры, Тебѣ́ еди́нѣй прикла́дныя, отъ на́съ недосто́йныхъ рабо́въ Твои́хъ, отъ всѣ́хъ родо́въ избра́нная, всѣ́хъ тва́рей небе́сныхъ и земны́хъ вы́шшая я́вльшаяся. Поне́же бо Тебе́ ра́ди бы́сть Госпо́дь си́лъ съ на́ми, и Тобо́ю Сы́на Бо́жія позна́хомъ, и сподо́бихомся свята́го Тѣ́ла Его́, и пречи́стыя Кро́ве Его́. Тѣ́мже блаже́нна еси́ въ ро́дѣхъ родо́въ, Богоблаже́нная, херуви́мовъ свѣтлѣ́йши, и серафи́мовъ честнѣ́йши су́щая. И ны́нѣ, Всепѣ́тая, Пресвята́я Богоро́дице, не преста́й моля́щися о на́съ недосто́йныхъ рабѣ́хъ Твои́хъ, е́же изба́витися на́мъ отъ вся́каго совѣ́та лука́ваго, и отъ вся́каго обстоя́нія, и сохрани́тися на́мъ неврежде́ннымъ отъ вся́каго ядови́таго прило́га діа́вольскаго. Но да́же до конца́ моли́твами Твои́ми неосужде́нныхъ на́съ соблюди́, я́ко да Твои́мъ заступле́ніемъ и по́мощію спаса́еми, сла́ву, хвалу́, благодаре́ніе и поклоне́ніе за вся́, въ Тро́ицѣ еди́ному Бо́гу и всѣ́хъ Созда́телю возсыла́емъ, ны́нѣ и при́сно, и во вѣ́ки вѣко́въ, ами́нь.

Моли́тва ко Го́споду на́шему Іису́су Христу́.

О, Вели́кій Царю́, Вседержи́телю, ми́лостивый Го́споди, Іису́се Христе́, Бо́же мо́й! Се́ на умоле́ніе къ Тебѣ́ а́зъ многогрѣ́шный предлага́ю Ма́терь Твою́ всенепоро́чную, Пречи́стую Госпожу́, Дѣ́ву Богоро́дицу и Влады́чицу всеми́лостивую, во все́мъ мíрѣ моли́твенницу за ро́дъ христіа́нскій, Тебе́ на́мъ ро́ждшую пло́тію Христа́ Бо́га на́шего, неизрече́нныя ра́ди ми́лости Твоея́, я́же на на́съ. Тоя́ у́бо моли́твами, Го́споди Іису́се Христе́, Бо́же на́шъ, покажи́ на мнѣ́ убо́зѣмъ вели́чія, благода́ть и ми́лость Твою́, оставле́ніе грѣхо́въ да́руй ми́, и сподо́би мя́ бы́ти наслѣ́дника Ца́рствія Твоего́, со всѣ́ми святы́ми, въ безконе́чныя вѣ́ки вѣко́въ, ами́нь.

Досто́йно е́сть... Трисвято́е, и по Отче на́шъ...
Тропа́рь: Повелѣ́нное та́йно...
Го́споди, поми́луй. [40.] И отпу́стъ:

Го́споди Іису́се Христе́, Бо́же на́шъ, моли́твами Пречи́стыя Твоея́ Ма́тере, преподо́бныхъ и богоно́сныхъ оте́цъ на́шихъ Анто́нія и Ѳеодо́сія Пече́рскихъ, и всѣ́хъ святы́хъ, поми́луй и спаси́ на́съ, я́ко Бла́гъ и Человѣколю́бецъ, ами́нь.

Ака́ѳисты съ кано́ны, и про́чая душеполе́зная моле́нія. — Кíевъ: Въ Тѵпогра́фіи Кіевопече́рской Ла́ѵры, 1754. — Л. 1-45.

Источникъ: «Русскiй Порталъ»

Оставьте комментарий!