google-site-verification: google21d08411ff346180.html Житие преподобнаго отца нашего князя Иоасафа, Каменского чудотворца | Справочно-информационный портал Алчевского благочиния

Житие преподобнаго отца нашего князя Иоасафа, Каменского чудотворца

Сентябрь 22nd 2012 -

Преподобный Андрей Спасокубенский, Каменский, князь
XVIII в. Церковь Воскресения на Варницах близ Тотьмы.

Память 10/23 сентября

Иже святое житие поживших и веру божественную сохранших, святых преподобных отецъ великих, и в постных подвизехъ просиявших, и непрестанными к Богу молитвами велику победу на враги показавшихъ, красная же и суетная мира сего отвергших будущая же ради жизни, яже уготова Богъ любящим его.

Аще бо иногда еллинстии басновторцы и нечестия языцы, иже Бога незнающий, Творца небу и земли, праздники же и поклонение идоломъ своимъ приносяще и елико можаху кождо ихъ тщахуся, от имений своих безумна темъ предлагаху, колми же паче нам, иже божественною благодатию посещенным от Вседержителя  Спаса Христа и святымъ крещениемъ просвещеннымъ, подобаетъ достойнымъ памяти святых праздновати духовно, и от Христа Бога дарованная тем чюдеса похваляти, и во псалмехъ и пениих служаще Господеви день и нощъ, памяти же ихъ ради подобаетъ яже предивъная слышахом истинну от неложных сведетелей достоит сице писанию предати, и о семъ бо чаяние, мзду будущих благъ, от Господа нашего Иисуса Христа прияти. Послушателемъ же и повелителемъ и сказателем, иже вправду сведущимъ,  паче же темъ, иже душевный разумъ  имущимъ  и тех святых жития делы исправляюще своими труды, непщуемъ бо иже преждепомянутая аще молчанию предати, то никако в забвение прейдут.

Изыдетъ, яко да и навыкнемъ известно, откуду сей таковый свътилникъ возсия? Еда от Иерусалима, или от Синая? Ни, рече, но в наших родехъ таковый просия светилник новый, понеже бо Святаго Духа дарованием крестъ Христовъ на рамо вземшей теснымъ путем шествовавше, и внидоша в радость Господа своего. Аще мы ленимъся воспомянути о сихъ, но сами чюдеса вопиют, и по сьмерти бо живи суще во веки. Аще ли же дерзнемъ слово рещи о семъ святемъ, о нем же намъ предлежитъ повесть, то веру несуменну к нему имуще. Таковых бо святыхъ отецъ терпеливому житию аггели дивишася и похъвалиша, и ихже имена написана суть на небесехъ. О семъ бо пишетъ в поучении своем Великий Василий, глаголя: «Будите ревнители право живущимъ и сихъ имена и дела напишите на сердцыхъ своих».

О сем бо страшить преписаний велми слово, зане не стяжах на собе всегда добрых делъ нимало, но на Бога надежду имея и на Пречистую Богоматерь, и на молитвы сего святаго и блаженнаго отца, Рускую похвалу, новаго чюдотворца, князя Иоасафа, имже посети Господь Богъ, Спасъ нашъ, людий Своих. В последняя роды наша прояви сицеваго чюдотворца, и всячески преписати попекийся, елико постигну иже о немъ.

Похвала преподобному отцу нашему князю Иоасафу, новому чудотворцу

Преже нас написана быша труды его, и хожение, и чюдодей ствие некоимъ списателем, о имени его писание не изъяви некако, и смутно, — ово зде и ово инде, и на многи части глаголана бяху чюдодействия бяху святаго. И вся, елика возмогохъ, яко во едину пленицу собравъ, или яко цветцы, от многихъ воедино, — яко де незабвенъна будутъ святаго отца исправления и чюдеса. Понужденъну ми бывшу, недостойному, на таковое духовное дело пастырем обители и инеми старцы, иже многа лета имущим в монастыри томъ велико по Бозе житие жившимъ мужемъ, в добродетели преизрядномъ. Мне же убо страстному, дерзнувшу преписати святаго отца житие и чюдеса, прочая же и достовернейшая чюдеса навыкъ от самого того писаниия (!), иже преже написана быша от некоего слагателя, ина же от слышания от неложных сведетелей. Сему же буди послухъ Духъ Святый, иже научивый преписати душеполезная учения, исправления святаго отца. Рече Господь: «Пытайте писания, яко в тех имате обрести жизнь вечную: в них сокровенъ Сынъ Божий, истина, мудрость Отчая, Егоже обрящетъ, блажен будет».

Аз же глаголю: Уясни ми языкъ, Спасе мой, и разшири уста моя и наполни я! Дай же ми глаголати подобная и творити полезная, иже мне окаянному по неизглаголанному милосердию подавъ словесную кормлю на послужение сицевому полезному благонравию в совершеннемъ житии отца нашего Иоасафа, да приимем добромыслием начало повести сия божственнаго и добляго и правдиваго ему жития юношескаго и постного и хожения. Молю же вы, всесвященный соборе и христоименитое и богоизбранное совокупление, молите за мя и за мою худость, яко понудисте мене, смиреннаго и недостойнаго и невежу клирика имярекъ, умъ имуща страстенъ и нечистъ, преписати житие и подвизи преподобнаго отца нашего князя Иоасафа. Обаче Бога в помощъ молитвами его призываю. Самъ бо рече Господь: «Призовите Мя и услышу васъ» (ср. Иер. 29: 12). «Всякъ бо просяй приемлетъ» (Мф. 7: 8; Лк. 11: 10). Господь Сам рече учеником, таже и ко всем в Него верующим, яко: «Без Мене не можете творити ничтоже» (Ин. 15: 5). Но, Господи, Господи, азъ начах о Тебе Самом.

Дозде прекратим слово, но на предлежащее возвратимся.

О рождении святаго благовернаго князя-инока Иоасафа

Сей благоверный и христолюбивый, князь Андрей Димитриевичь родися от благовернаго князя Димитрия Васильевича Заозерскаго Меншаго и от благоверныя и благочестивыя великия княгини Марии. И крестиша его во имя Отца и Сына и Святаго Духа, и нарекоша имя ему во святом крещении Андрей. И устрабившуся отроку, и седмаго лета достигшу, и вданъ бывает на учение грамоте, и приобрете юный отсюду великая. Погружался убо в любовь учения и писания, божественаго внимания, исходя во глубину мыслей божественных, обретает бисеръ разума, разумевает Бога, призывает богатство благости Божий. Срамляется прочее юношеских обычаевъ возержатися, тихъ некако и гладок бывает юнный. И летом убо приходящим, и совершенънаго возраста достизает, и нудим бывает родителема браку совокупитися. Оному же не хотящу, родители же неослабно нудяще его, он же не хотяше преслушатися родителей своих, поминая Писание, яже повеление родителей не безбедно прияти, чтити бо повелеваетъ рождьших заповеди. И апостолъ послушати родителей повелевает, и се правде быти Божий повествуетъ. Несвободна себе зря ко иже от него желаемым, повинуется родителскому повелению и, не хотя, браку совокупляется.

И мало быв, супружница его къ Господу отходит, бывъ с ним лето едино. Он же, свободна зря себе. Отецъ же сего блаженнаго отрока, благоверный князь Димитрей Васильевичь, состави обитель Пресвятыя Богородица, честнаго и славнаго ея Покрова, иже есть Глушица. В та же лета Дионисие изыде ис пострижения своего с Каменного от Спаса и, походивъ многа места, и обрете место, зовомо Глушица, и посылаетъ к сему князю о древоделех. Он же не токмо древоделя посылаетъ, но и милостыню доволну, и села и деревни подаетъ монастырю. Да не токмо сию обитель устраяет, но и подобну сей, Александрову зовому, иже на реке Куште. Такоже села и деревъни подаде многи на прекормление братии.

Житие же имея благоверный князь Димитрей над рекою, зовомою Кубеницею. Храм же име близъ двора, великого мученика Димитрия Селунскаго чюдотворца, иже и доныне есть нами видим. Весь же зовомо Чиркова. К тому прихожаше, и молитвы возсылаше Богу, и великомученика Димитрия на помощь призываше, чтобы ему дароваль Богь плодъ чадородия. Богъ же не презре моления его, но дарова ему сего благовернаго князя Андрея Димитриевича, о немже намъ слово предлежитъ.

Многажды грехъ ради наших Богу попущающу за грехи ово гладом, ово моромъ, иногда же нашествиемъ иноплеменных, и в та времена Симова жребия бесерменска языка, рекше Казанские земли татарове, много тогда немирование имуще со благоверными князи, и мнози гради пожгоша, и веси повоеваша, и сего благовернаго князя Димитрия Васильевича убиша во граде Ярославле. И тогда сей благочестивый отрокъ, видящи сего света скорое минутие и родителское оставление, и воспомянувъ Спасово слово во святемъ Еуанглии: «Аще и весь миръ приобрящетъ, душу отщетитъ, и что дастъ измену на души своей?» (Мф. 16: 26; Мк. 8: 33; Лк. 9: 25), — по апосталу, «вся уметы вменивъ, да Христа приобрящу» (?) [Странно, что Прохоров не определил - это Фил. 3,8 - прим. Я.Кротова к электронному варианту, 2008]. Такоже и мати сего блаженнаго и преподобнаго благовернаго князя Андрея Димитриевича оставляетъ житие се и отходить к вечнымъ обителемъ. И положено бысть тело ея въ Ярославле же.

Не бо лепо инымъ родителемъ таково чадо родити, ни же убо достойно таковому и чюдному чаду ото иныхъ родителей родитися, аще бы не смотрениемъ всех Содетеля, Бога. Кое ли приложениемъ славы его соделаю, ибо немеримо есть, яко ни море в не текущих рекъ, есть бо и без того полно. Иным бо человекомъ в начатцы похваление бываеть, инымъ же в средовечие, другуму же в старости. Сий убо весть с похвалою добродетели вся лета жития его соверши. Единъ же благочестенъ родися, многимъ родителем славу прорасти елико найдет. Тако и той умножися рещи о немъ, якоже во всю землю изыде слава его, и в конецъ вселенныя Его и величества Его.

Да кому уподоблю великаго князя Димитрия Васильевича и его отрасль, благовернаго князя Андрея и настольника великому княжению, и собрателя христианъскаго? Приидите любимицы, церковнии друзи, к похвалению словеси — по достоянию похвалити земли Руской держатель.

II по рождении сего святаго отрока не бысть родителема же его иною чаду и до отшествия ихъ ко Господу.

Pages: 1 2 3 4

Оставьте комментарий!