google-site-verification: google21d08411ff346180.html Канонъ молебный в скорби и обстояніи | Алчевск Православный

Канонъ молебный в скорби и обстояніи

Август 29th 2018 -

Тропарь, гласъ 6-ый:

Благоутробне, долготерпѣливе и всещедрый Господи, низпосли милость Твою на люди Твоя.
Слава: Яко щедрый Господи, умилосердися на люди Твоя, яко долготерпеливъ, примирися и помилуй ны.
И нынѣ: Пресвятая Владычице, всепѣтая, благословенная, яко боголюбивая, утѣши и помилуй насъ.

Канонъ, гласъ 6.
Пѣснь 1.
Ирмосъ: П
омощникъ и Покровитель:

Припѣвъ: Помилуй насъ, Боже, помилуй насъ.
Тѣснотою обстояниій одержими, къ Тебѣ прибѣгаемъ, Владыко Человѣколюбче, не отвержи насъ въ часъ сей смятенія душъ нашихъ, Блаже.
По пятамъ гнаше фараонъ люди Израильтестіи, но не достиже: се и намъ во слѣдъ устремишася устрашенія адова; скорбь близъ и несть избавляяй.
Не погуби насъ со беззаконьми нашими, Спасе, но простри, Владыко, сильную Твою руку во избавленіе наше.
Припѣвъ: Святіи Первопрестольницы Россійстіи, молите Бога о насъ.
Спаса Христа молите, велиціи чудотворцы и избранніи, избавитися намъ отъ бѣдъ и скорбей и варварскаго плѣненія вашими молитвами.

Слава:

Сквозѣ Чермное море преведъ, свободилъ еси люди Твоя, Сильне: свободи и насъ, Блаже, отъ облежащихъ ны бѣдъ и скорбей.

И нынѣ:

Колесницы фараоновы видѣвъ, Моѵсей въ тѣснотѣ и скорби къ Богу воззва о людехъ своихъ: о насъ же кто воззоветъ, аще не Ты, Мати Чистая?

Пѣснь 3.
Ирмосъ: Утверди, Господи:

Подвигошася сердца наша, Владыко, смутихомся отъ гнѣва лица Твоего, пощади насъ, яко единъ святъ еси и Господь.
Утвердися врагъ на ны, преклонихомся отъ немощи нашея, преклонихомся, не возможемъ стати: воздвигни насъ, Щедре, во упованіи Твоемъ утверждая.
Вознеси рогъ нашъ, Блаже, да не когда будемъ брашно чуждему, Спасе, Самъ насъ помилуй.

Первопрестольникомъ:

Прострите длани ваша, святіи отцы, ко всѣхъ Владыцѣ и устнѣ ваша на молитву утвердите, ускорите на помощь нашу, и отъ находящихъ на насъ бѣдъ и золъ и всякія нужды избавите насъ вашими къ Богу молитвами.

Слава:

Даждь молитву молящимся Тебѣ, Христе: како бо помолимся, не вѣмы, аще не Духъ Твой Святый восходатайствуетъ о насъ ко Отцу.

И нынѣ:

Матерніи руцѣ на моленіе простерши ко Владыцѣ, Сыну Твоему, заступи насъ крѣпко, Дѣво Богородице.

Пѣснь 4.
Ирмосъ: У
слыша Пророкъ:

Преклонивый небеса схожденіемъ Твоимъ, Спасе, во еже слышати воздыханія окованныхъ, разрѣшити сыны умерщвленныхъ, разрѣши намъ узы скорби, содержащія ны, Благоутробне.
Се, труждающіися въ печали и скорбію обремененніи къ Тебѣ течемъ: помяни слово Твое сладчайшее, еже реклъ еси: “прідите ко Мнѣ”, Спасе нашъ кроткій.
Пустыню прошедый во еже взыскати овча погибшее, Спасе, взыщи насъ въ пустыни отчаянія нынѣ, да не отъ мысленнаго волка звѣроуловлени будемъ, Пастырю добрый.

Первопрестольникомъ:

Надежду имуще васъ, святіи отцы, Петре, Алексіе, Іоно, Филиппе и Ермогене, и, яко стѣну недвижиму, къ Богу ваши молитвы, золъ и всѣхъ бѣдъ избавляемся.

Святителю Филиппу:

Новъ явился еси ревностію, якоже вторый Моѵсей, не знаменіи страшными удивляя, но божественныхъ словесъ ученіи наставляя, къ тихому пристанищу новаго Израиля отъ страстей Египта изводя.

Слава:

Страшно прещеніе Твое, Царю вышній, Его же трепещутъ небо и земля, но о имени Сына Твоего, подъемшаго бремена наша, вопіемъ: пощади, Многомилостиве.

И нынѣ:

При Крестѣ божественное истощаніе Чада Твоего возлюбленнаго зрѣвшая, Мати, глубину золъ болѣзненно прешла еси, Непорочная; вѣси, каково есть сіе, и на страждущія любовію соскорбящи призираеши.

Пѣснь 5.
Ирмосъ: О
тъ нощи утренююще:

Призри на нищету нашу и скорбь нашу, Владыко: се, ниже воззрѣти нынѣ можемъ, къ Тебѣ, Свѣту нашему незаходимому.
Нощь отчаянія обыде насъ, мракомъ золъ облежащая: возведи насъ въ радость Твою, Утѣшителю благій, звѣздою свѣтлою утреннюю.
Гдѣ еси, Господи? вопіемъ. Вскую отринулъ еси насъ, Благій? почто забыл еси насъ, Создателю нашъ? — но николиже воззрѣхомъ къ Богу чуждему, Спасе, Самъ насъ помилуй.

Первопрестольникомъ:

Исполните, святіи отцы, веселія жизнь нашу, избавляюще насъ варварскаго плѣненія и междоусобныя брани.

Святителю Алексію:

Вскую унываемъ, согнѣтаемы множествомъ печалей, имуще скорбных утѣшителя, святителя Алексія, избавляюща ны отъ бѣдъ и скорбей нашихъ, и отъ врагъ видимыхъ же и невидимыхъ?

Слава:

Сыне Божій, миръ Твой неизреченный апостоломъ Твоимъ въ скорби подавый, подаждь и намъ отъ сего въ часъ сей смятенія сердецъ нашихъ, Духомъ Отчимъ насъ осѣняя.

И нынѣ:

Заре свѣтлаго дне Господа, Сына Твоего, Мати Чистая, испроси намъ просвѣщеніе душъ нашихъ озареніемъ Духа Святаго.

Пѣснь 6.
Ирмосъ: В
озопихъ всѣмъ сердцемъ:

Очисти ны, Спасе, очисти ны, да не покрыетъ главы наша бездна грѣховная и потонемъ въ пучинѣ отчаянія.
Бурею носими непостоянною, съ кораблецемъ малымъ потопляеми, Тебе, тихое пристанище наше и желанное, взыскуемъ: привлеци нас, Щедре, скоро, да не погибнемъ.
Услыши, Господи, вонми, Владыко нашъ. Спаси, Спасе нашъ: еще мало, и крѣпости ни единыя же будетъ въ насъ.
Первопрестольникомъ:
Смерти, и ига, и варварскаго плѣненія избавите, и огненнаго запаленія свой градъ сохраните, къ Богу вашими молитвами.

Святителю Петру:

Храни градъ свой, святителю Петре, отъ безбожныхъ и невѣрныхъ поруганія и отъ междоусобныя рати, моляся непрестанно Владыцѣ Христу еже миръ паствѣ твоей даровати.

Метки:

Pages: 1 2

Комментарии закрыты.