google-site-verification: google21d08411ff346180.html Похвала преподобному отцу нашему князю Иоасафу | Справочно-информационный портал Алчевского благочиния

Похвала преподобному отцу нашему князю Иоасафу

Сентябрь 22nd 2012 -

Светла и просвещенъна намъ всечестнаго отца днесь, братие, восия память, пресвътлою бо славою озаряющи насъ и свътло просвещающи. Свътла убо, просвещенна и всяко коя (!) почести о Бозе и радости достойна, имъ же ваших боголюбивыхъ душъ, яко возлюбленныхъ чадъ отецъ к духовному веселию ныне возваше.

И яко любителя отца во светлей сей церкви радостно приемлюще и любовию веселящся преже деже (!) плотьския духовную вамъ мною предуготовляющи трапезу, исполнь сущи похвалы святых, с ними же и того самого отца исполнь радости духовнаго веселия, исполнь радости божественых словесъ, аггельския пища.

Пищу бо аггельскую Писания словеса нарицаю, им же душа внимающи, умомъ наслаждаются, и, яко же пищею тело, словом укрепляема бываетъ. Сладость же Божиих словесъ Давыдъ вкусивъ, и о сихъ удивляяся, к Богу глаголетъ: «О, коль сладка гортани моему словеса Твоя, паче меда устом моим. От заповедей бо Твоих разумехъ, и сего ради возненавидех всякъ путь неправды» (/7с. 118: 103—104). Плотскую бо трапезу иногда седоша людие ясти, якоже пишется, и по сытости воставше, насыщшаго ихъ Бога забывше, наченше играти безчинством, и падоша трупия их на пустыни. Словесную же духовную трапезу нецыи ядуще и сладостию насыщаеми и умаляеми (!), многащы хлебъ свой снести забыша.

Дозде прекратим слово, паки же всячески к похвалению устремимся, якоже некий от хитрых нырецъ в море от корабля вметают себе, ищутъ бисеръ изяти, — кольми же паче тленнаго бисера нетленное духовное торжество ныне добрыми делы обновляющая, светлая и чюдная днесь преподобнаго в память в том от православных совершается, исполнь радости и веселия, и благочестивых сердца и душа всякого очищаетъ древняго омрачения, и верою светлою озаряя и днесь, и любовию духовною подвизая на вечно житие.

О, твердаго адаманта, духовным питием напоившаго жаждущая душа добродетели, яко кринъ во удолии процвете светло, Святей Троицы предстоя! Тем же вся вселенная озарившеся светлозарными лучами, в пресветлую паметь предивнаго сего новаго рускаго чюдотворца, радостно ликоствующе.

Иоасафе, пречюден сый на земли, тем же, христолюбивый ты, граде Вологда, слыши убо и паче внемли: и блаженъ еси и паки преблаженъ во всехъ градехъ: отселе не вдовствуеши, но благодатию Христовою просвешенъ, иже в тебе просиявшу таковому светилнику. Не от Иерусалима бо, рече, ни от Синая, но в тебе израсте и процвете, яко кринъ во удолии. Похвалами почти и торъжествуйте присным веселием ко Господу, благочестивии князи и боляре, и сановницы и все христолюбивое воинство, и властелский санъ держаще, и честныя игумены, и священницы, и диякони, и причет церковный, и черноризцы, также и боголюбивыя мужи во-логжане, купно же и жены быша, и отроки, и девы, богатии и убозии, и нищий, и всея Великия Росия христолюбивии людие, рождение винограда Христова! Вси общему Отцу возплещите радостию духовною и сердечныма рукама и воскликните от душа и сердца, воздыхающе и воздающе славу Богу, ущедрившему вы и помиловавшему васъ великою Своею милостию, понеже прозябосте напоследокъ века. Сице бо последний у Бога яко первии, а первии Ему яко последний. И сего ради израсти Вологда и изнесе дивно чюдо и божественъ плод — великаго и Богомъ даннаго имъ гражданина, знаменна Богом, Иоасафа пребогатаго, сияя яко солнце изрядными чюдесы и знаменьми освящая инокъ множества. О, трисолнечный Троицы угодниче! О, честныя мощи, болящим исцеления дарующа! О, неистощимый потокъ чюдесемъ!

О, небесныя доброты подобие! Что бо рече божественый про-рокъ: «Похваляему праведнику, возвеселятся людие». Ныне же не токмо людие, но и небо и земля радуется ради настоящаго праздника божественыя церькве, иже во обители святаго, на память праздничную преподобнаго чюдотворца, сего княза Иоасафа.

Днесь бо небесныя силы хваляще достойно, и преподобный ликовствующе,  праведницы  с  постники   веселятся,  от  Господа мзду трудовъ своих приемлюще Царьство небесное. Принесемъ же и мы сице хваления, венчаемъ и величаем честную главу его, глаголюще:

Радуйся, светозарное солнце, чюдотворче Иоасафе, отче нашъ, просвещая покаянием озлобленыя зимою греховною, техъ согревая и обращая и воставляя, яко отець чюдолюбивый (!).

Радуйся, луна пресветлая, иже нощъ нашего неразумия отгоняеши, смиреномудрым учителем учение!

Радуйся, звездо светлейшая, денница возходная, своими труды ясно возвещая намъ светъ, будущаго века пребывание!

Радуйся, яко светоносная заря, иже благочестием верныхъ просвещая!

Радуйся, прелюбимая весно, изряащая божественую намъ любовь, якоже прекрасныя цветы душевныя доброты!

Радуйся, иже при животе своемъ некоего инока от раскаяния спасль еси, о отданнем сребре на сооружение обители твоея! Ты же, отче, милостивно показуя его не ктому согрешати, Божиею благодатию даруеши ему прозрение, якоже при купели.

Радуйся, источникъ преславный, паче меда и сота черплющим от добраго твоего исцеление неоскудно!

Радуйся, яко божественныхъ чюдесъ от тебе всему миру удивление!

Радуйся, инокомъ трудолюбивым утвержение и ленивым обличитель!

Радуйся,  иже  по  преставлении  своем  к  Богу  списателя,  в не доумении бывша и о твоем добродетелном житии, ты же его с наставником своим игуменом Касияном и с Пречистою Богородицею Мариею и со архаггелом явлениемъ своим уверилъ еси! Радуйся, учителю истинный на спасение намъ! Радуйся, постником удобрение, иже самъ собою намъ образъ показавый!

Радуйся, смирению рачитель сый, гордости обличитель! Радуйся, древнему пророку Илии поревнуя: он бо царя Ахава обличи, безаконие творяща и пророки студныя ножемъ закла, изьядающих трапезу Ельзавелину, ты же о недоведомей тайне Столпа философа, мнением превозносящягося, посрамиль еси и того Божию суду предаль еси!

Pages: 1 2

Комментарии закрыты.