Молитва святому блаженному Павлу Таганрогскому

Март 22nd 2011 -

Молитва святому блаженному Павлу Таганрогскому

икона Павел Таганрогский

О великий угодниче Божий и чудотворче, святый блаженный Павле! Ты, на высоту добродетелей восшед, яко пресветлая звезда житием твоим возсиял еси, и странническое жительство избрав, мира сего красная ни во чтоже вменил еси. Темже Всеправедный Судия многими чудесы тя прослави. Душу же твою святую в небесныя обители всели, идеже любве Божией наслаждаяся, и наши нужды зриши, прошения слышиши. Буди нам в недузех целитель, по морю плавающим кормчий и утопающим благонадежное избавление. Молим тя, Павле блаженне: испроси всем, во всякой нужде сущим и ко твоему наступлению прибегающим, всякий дар коемуждо благопотребен: веры и любве преспеяние, благочестия умножение, мира утверждение, больным исцеление, печальным утешение, бедствующим помощь, обидимым защищение. И сподоби ны, угодниче Божий, молитвами твоими благочестно житие земное скончати, Небесное Царствие и живот вечный унаследити, со всеми святыми, в безконечныя веки веков. Аминь.

Тропарь, глас четвёртый:

Отечества Небесного взыскуя, дом родителей твоих оставил еси. Тленное богатство мира презрев, обогатился от Господа многими чудесы и знаменьми. Воздержанием, труды и молитвою насладился еси, образ жития благочестивого являя. Темже и ныне с верою приходящим к тебе во всяцех напастех помогаеши. Блаженне отче Павле, моли Христа Бога спастися душам нашим.

Оставьте комментарий!