google-site-verification: google21d08411ff346180.html Молитва ко преподобному Аристоклию Афонскому, чудотворцу Московскому | Справочно-информационный портал Алчевского благочиния

Молитва ко преподобному Аристоклию Афонскому, чудотворцу Московскому

Сентябрь 5th 2012 -

Тропарь преподобному Аристоклию, глас 4

Процвел еси яко финикс на святей горе Афонстей и яко кедр на земли русстей умножился еси, Духа Святаго стяжав чистотою богоугоднаго жития и мир Христов воцарися в души твоей, преподобне отче Аристоклие, моли Христа Бога отче Аристоклие, моли Христа Бога спастися душам нашим.

Кондак, глас 8

Новою звездою на небе церковнем возсиял еси, прошед путь многотруднаго монашескаго жития, подвигами добродетелей венцы нетленныя обрел еси, и поприще послушания во граде Москве мужественне скончал еси. Темже и Христос Бог даром чудес обогати тя, преподобне отче Аристоклие, Афонская похвало и земли российския украшение, поминай нас, чтуших святую память твою.

Молитва:

О, святый угодниче Божий и преславный старче Аристоклие, святыя горы Афонския подвижниче и града Москвы неустанный молитвенниче! Прилежно чтуще твою честную память, припадаем к святым твоим мощем и тепле вопием: призри на нас, чад твоих духовных, ищущих в бедах твоея помощи и заступления, в болезнех душевных и телесных исцеления, в скорбех утешение и вразумление. Сотвори твоими молитвами нашу веру непоколебиму, да ею спасаемся от всякия напасти и действа вражия, соблюди нашу надежду непостыдну, да не впадем в уныние в час злых искушений, потщися возгревати в нас, малодушных и немощных, любовь нелицемерну, да не всуе подъемлем труды христианскаго подвига и во след Христа грядуще добропобедно понесем крест нашего земнаго жития, ты бо обещался еси по кончине своей слышати прошения всякаго, аще с верою приидет к месту твоего упокоения. И ныне по прославлении тя Церковию Божиею рака твоих честных мощей явися залогом твоея любве и попечения о нас, чающих твоего предстательства пред престолом Царя Небеснаго. Испроси у Бога Вседержителя стране нашей мир и тишину, пастырем мудрое окормление, монашествующим обетов соблюдение, народу нашему благочестие и вся, яже ко спасению полезная. Не премолчи о нас молитися в Троице славимому Богу, Емуже подобает всякая слава, честь и поклонение Отцу и Сыну и Святому Духу, ныне и присно и во веки веков. Аминь.

Источники:

Акафист: подворье русского на Афоне Свято-Пантелеимонова Монастыря в Москве
Храм Святого великомученика Никиты — 2005 год
По благословению священноархимандрита Иеремии,
игумена Свято-Пантелеимонова монастыря

Оставьте комментарий!