Молитва Блаженной Любови Рязанской
Февраль 20th 2012 -
Тропарь Блаженной Любови Рязанской
Любовью наречена была еси во святем крещении, Любовь Христову познала еси в житии, Богу и человеком любовию послуживши, дерзновение велие стяжала еси, тем же к тебе усердно прибегаем, из глубины сердец наших взывающе: молися убо ко Господу, Любовь блаженная, богомудрая, даровати мирови мир и душам нашим велию милость.
Кондак
Святителем Христовым Николаем исцеленная и на служение Богу и людям им же благословенная, крест свой юродства с любовию до конца пронесшая, святая блаженная Любовь, не остави нас, почитающих святую память твою, предстоя в лике святых Престолу Пресвятыя Троицы, молися о благоденствии Отечества твоего и о спасении душ наших.
Молитва Блаженной Любови Рязанской
О достоблаженная мати Любовь, угодница Христова! Услыши нас, грешных, молящихся тебе. Прими молитву нашу и принеси ю к Милостивому и Человеколюбцу Богу, Емуже ты ныне в радости святых и с лики Ангел предстоиши. Умоли Его благосердие, да сохранит град сей Рязань, в немже, добродетельно поживши, Богу угодила еси, от всех навет вражиих, да не осудит ны по беззакониям нашим, но да сотворит с нами по милости Своей. Испроси нам у Христа и Бога нашего мирное и безмятежное житие, здравие душевное и телесное, земли благоплодие и во всем всякое изобилие и благоденствие, и да не во зло обратим благое, даруемое нам от Всещедраго Бога, но во славу Его и в прославление твоего заступления. Паки молим тя, блаженная мати наша Любовь, посещай нас, тебе молящихся, в нуждах наших, да тобою заступаеми, сподобимся в день Судный одесную Сына Божия стати твоими святыми молитвами ко Спасу и Пресвятей Его Матери, Преблагословенней Владычице нашей Богородице, от всех родов ублажаемой, ныне и присно и во веки веков. Аминь.
